നീണ്ട ഇടവേളയ്ക്ക് ശേഷം സത്യന്‍ അന്തിക്കാട് സംവിധാനം ചെയ്ത ചിത്രമാണ് മകള്‍. മീരാ ജാസ്മിന്റെ തിരിച്ചുവരവ് കൊണ്ടും ചിത്രം ശ്രദ്ധേയമാണ്. ജയറാമാണ് ചിത്രത്തില്‍ മറ്റൊരു പ്രധാന കഥാപാത്രത്തെ അവതരിപ്പിക്കുന്നത്. ഇപ്പോഴിതാ ചിത്രത്തെക്കുറിച്ചും അതിലേക്ക് മീരാ ജാസ്മിന്റെ കടന്നുവരവിനെക്കുറിച്ചുമെല്ലാം മനസ് തുറക്കുകയാണ് സംവിധായകന്‍ സത്യന്‍ അന്തിക്കാട്.
ഒരു ടീനേജറെ അച്ഛന്‍ എങ്ങനെ ഡീല്‍ ചെയ്യുന്നു എന്നിടത്തുനിന്നാണ് മകള്‍ എന്ന ചിത്രത്തിന്റെ കഥ രൂപംകൊണ്ടതെന്ന് സത്യന്‍ അന്തിക്കാട് പറഞ്ഞു. നായകനായി ജയറാമിനെ തീരുമാനിച്ചു. മകളായി ദേവിക സഞ്ജയ്‌യെയും കാസ്റ്റ് ചെയ്തു. അമ്മയായി ആര് എന്ന ചോദ്യം ഉയര്‍ന്നപ്പോള്‍ മീരയുടെ മുഖമാണ് മനസില്‍ തെളിഞ്ഞത്.
വാട്‌സ്ആപ്പ് നമ്പറില്‍ മീരയുമായി ബന്ധപ്പെട്ട് സിനിമ ചെയ്യുന്ന കാര്യം പറഞ്ഞു. അപ്പോള്‍ മീര പറഞ്ഞത് കുറച്ചു ദിവസങ്ങളായി സത്യന്‍ അങ്കിളിന്റെ സെറ്റ് മിസ് ചെയ്യുന്നുവെന്നും എന്നെങ്കിലും സിനിമ ചെയ്യുകയാണെങ്കില്‍ അഭിനയിക്കണമെന്നുമായിരുന്നുവെന്ന് സത്യന്‍ അന്തിക്കാട് പറഞ്ഞു. ഒരു ടീനേജറിന്റെ അമ്മയാണ് കഥാപാത്രമെന്ന് മൂന്‍കൂട്ടി പറഞ്ഞിരുന്നു. ചിലര്‍ക്കത് ഉള്‍ക്കൊള്ളാന്‍ കഴിയില്ല എന്നതുകൊണ്ടാണ് മീരയോട് അക്കാര്യം സൂചിപ്പിച്ചത്. യാതൊരു മടിയും കൂടാതെ കഥാപാത്രം ചെയ്യാന്‍ മീര സമ്മതിച്ചു. അതിനുള്ള മെച്യൂരിറ്റി തനിക്കായില്ലേ എന്ന് മീര ചിരിച്ചുകൊണ്ട് പറഞ്ഞുവെന്നും സത്യന്‍ അന്തിക്കാട് പറഞ്ഞു.
