ശങ്കർ – കമലഹാസൻ കൂട്ടുകെട്ടിൽ ഒരുങ്ങുന്ന ബ്രഹ്മാണ്ഡ ചിത്രം ഇന്ത്യൻ 2ന്റെ ലൊക്കേഷനിൽ ക്രെയിൻ നിലം പതിച്ച് മൂന്ന് പേർ മരിക്കുകയും പത്ത് പേർക്ക് പരിക്കേൽക്കുകയും ചെയ്‌തിരുന്നു. സംവിധായകൻ ശങ്കറിന്റെ അടുത്ത സുഹൃത്തായ അസിസ്റ്റന്റ് ഡയറക്ടർ കൃഷ്‌ണ, ആർട്ട് അസിസ്റ്റന്റ് ചന്ദ്രൻ, പ്രൊഡക്ഷൻ അസിസ്റ്റന്റ് മധു എന്നിവരാണ് കൊല്ലപ്പെട്ടത്. സംഭവത്തിൽ പരിക്ക് പറ്റിയിരുന്ന സംവിധായകൻ ശങ്കർ സംഭവത്തെ കുറിച്ച് വികാരാധീനനായി സംസാരിച്ചിരിക്കുകയാണ്.
ഉള്ളിൽ വളരെയധികം വിഷമത്തോടെയാണ് ഞാൻ ഇത് എഴുതുന്നത്. ലൊക്കേഷനിലെ ആ സംഭവത്തിന് ശേഷം ഞാൻ ഒരു ഷോക്കിലാണ്. എന്റെ അസിസ്റ്റന്റ് ഡയറക്ടറുടെയും സംഘാംഗങ്ങളുടെയും വേർപാടിനെ തുടർന്ന് ഉറക്കമില്ലാത്ത രാത്രികളാണ് എന്റേത്. തലനാരിഴക്കാണ് ആ ക്രെയിൻ അപകടത്തിൽ നിന്നും ഞാൻ രക്ഷപ്പെട്ടത്. ആ ക്രെയിൻ എന്റെ മേൽ പതിക്കുന്നതായിരുന്നു ഇതിലും ഭേദം. ജീവൻ നഷ്ടമായവരുടെ കുടുംബാംഗങ്ങൾക്ക് എല്ലാ വിധ പ്രാർത്ഥനകളും.
