മലയാളത്തിന്റെ പ്രിയനടൻ മോഹൻലാൽ നായകനായി എത്തിയ ചിത്രമായിരുന്നു ഒടിയൻ. വി എ ശ്രീകുമാർ സംവിധാനം ചെയ്ത ചിത്രം റിലീസിനു മുമ്പേ വലിയ ഹൈപ്പോടെയാണ് എത്തിയതെങ്കിലും വിചാരിച്ച വിജയം നേടാൻ കഴിഞ്ഞിരുന്നില്ല. എന്നാൽ, ബോക്സ് ഓഫീസിൽ ചിത്രം വിജയമായിരുന്നു. വി എ ശ്രീകുമാറിന്റെ ക്യാമറയുടെ മുന്നിലേക്ക് മോഹൻലാൽ വീണ്ടുമെത്തുന്നു. എന്നാൽ അത് സിനിമയിലല്ല ഒരു പരസ്യചിത്രത്തിനു വേണ്ടിയാണെന്ന് മാത്രം.
മോഹന്‍ലാല്‍ പുതുതായി ബ്രാന്‍ഡ് അംബാസിഡര്‍ ആവുന്ന ഒരു ബിസ്കറ്റ് കമ്പനിയുടെ പരസ്യചിത്രത്തിനു വേണ്ടിയാണ് മോഹന്‍ലാലും വി എ ശ്രീകുമാറും വീണ്ടും ഒന്നിക്കുന്നത്. ഈ പരസ്യചിത്രം ഷൂട്ട് ചെയ്യുന്നത് ഒടിയന്റെ പ്രധാനലൊക്കേഷൻ ആയിരുന്നു പാലക്കാട് ആയിരുന്നു എന്ന പ്രത്യേകതയും ഉണ്ട്. സിനിമയില്‍ എത്തുന്നതിന് മുമ്പ് തന്നെ പരസ്യമേഖലയില്‍ സജീവമായിരുന്നു വി എ ശ്രീകുമാര്‍. പുഷ് എന്നാണ് ശ്രീകുമാറിന്റെ അഡ്വര്‍ട്ടൈസിംഗ് കമ്പനിയുടെ പേര്. ഇദ്ദേഹം ഒരുക്കിയ പരസ്യങ്ങളില്‍ ഇന്ത്യയിലെ ഒട്ടുമിക്ക സൂപ്പര്‍താരങ്ങളും അഭിനയിച്ചിട്ടുണ്ട്.
എം ടി വാസുദേവന്‍ നായരുടെ നോവലിനെ ആസ്പദമാക്കിയുള്ള രണ്ടാമൂഴം സിനിമ നേരത്തെ വി എ ശ്രീകുമാര്‍ സംവിധാനം ചെയ്യുമെന്ന് പ്രഖ്യാപിച്ചിരുന്നതാണ്. മോഹന്‍ലാലിനെ ആയിരുന്നു ഇതിൽ നായകനായി പ്രഖ്യാപിച്ചിരുന്നത്. എന്നാല്‍ പ്രോജക്റ്റ് നീണ്ടു പോയതിനെ തുടര്‍ന്ന് എംടിയും ശ്രീകുമാറും തമ്മില്‍ തര്‍ക്കം ഉടലെടുക്കുകയും അത് കോടതി വരെ എത്തുകയും ചെയ്തിരുന്നു. നിലവില്‍ ആ പ്രോജക്റ്റ് ഉപേക്ഷിക്കപ്പെട്ട നിലയിലാണ്. മാപ്പിള ഖലാസികളുടെ ജീവിതം പറയുന്ന ഒരു ബോളിവുഡ് ചിത്രം വി എ ശ്രീകുമാറിന്‍റേതായി വരാനുണ്ട്. ടി ഡി രാമകൃഷ്ണൻ ആണ് ഇതിന്റെ രചന. മോഹന്‍ലാല്‍ നായകന്‍ ആയി എത്തുന്ന ചിത്രത്തിന് മിഷന്‍ കൊങ്കണ്‍ എന്നാണ് പേരിട്ടിരിക്കുന്നത്.
