മമ്മൂട്ടിയെ നായകനാക്കി അമൽ നീരദ് സംവിധാനം ചെയ്ത ഭീഷ്മപർവം എന്ന ചിത്രത്തിന്റെ ഒ ടി ടി റിലീസ് തീയതി പ്രഖ്യാപിച്ചു. ഡിസ്നി പ്ലസ് ഹോട്ട്സ്റ്റാർ ആണ് ഒ ടി ടി റിലീസ് തീയതി പ്രഖ്യാപിച്ചത്. ചിത്രം ഏപ്രിൽ ഒന്നിന് ഒ ടി ടിയിൽ റിലീസ് ചെയ്യും. മാർച്ച് മൂന്നിന് ആയിരുന്നു തിയറ്ററുകളിൽ ഭീഷ്മപർവം റിലീസ് ചെയ്തത്. വലിയ വരവേൽപ്പ് ആയിരുന്നു ചിത്രത്തിന് ലഭിച്ചത്. തിയറ്ററുകളിൽ വിജയകരമായി പ്രദർശനം തുടരുന്നതിന് ഇടയിലാണ് ഒ ടി ടിയിൽ റിലീസ് ചെയ്യുന്നത്. ചിത്രത്തിന്റെ ട്രയിലറും പാട്ടുകളും വൻ ഹിറ്റ് ആയിരുന്നു. ഭീഷ്മപർവം സമ്മാനിച്ച ‘ചാമ്പിക്കോ’ ഫോട്ടോ ട്രെൻഡ് ഇതുവരെയും അവസാനിച്ചിട്ടില്ല.
വൻ താരനിര ആയിരുന്നു ഭീഷ്മ പർവത്തിൽ മമ്മൂട്ടിക്ക് ഒപ്പം എത്തിയത്. തബു, സൗബിൻ ഷാഹിർ, ഷൈൻ ടോം ചാക്കോ, ഫർഹാൻ ഫാസിൽ, ശ്രീനാഥ് ഭാസി, ദിലീഷ് പോത്തൻ, അബു സലിം, ലെന, മാല പാർവതി, നദിയ മൊയ്തു, ഹരീഷ് പേരടി എന്നിരാണ് ചിത്രത്തിലെ മറ്റ് അഭിനേതാക്കൾ. ഛായാഗ്രഹണം – ആനന്ദ് സി ചന്ദ്രന്‍, സംഗീതം – സുഷിന്‍ ശ്യാം, എഡിറ്റിംഗ് – വിവേക് ഹര്‍ഷന്‍.
അടുത്ത കാലത്ത് വലിയ പ്രി റിലീസ് ഹൈപ്പുമായി എത്തിയ ചിത്രമായിരുന്നു ഭീഷ്മപർവ്വം. മമ്മൂട്ടിയും അമൽ നീരദും ആദ്യമായി ഒന്നിച്ച ചിത്രം ബിഗ് ബി ആയിരുന്നു. ബിഗ് ബി റിലീസ് ചെയ്ത് 14 വർഷത്തിനു ശേഷം ഇരുവരും ഒരുമിച്ച ചിത്രമായിരുന്നു ഭീഷ്മ പർവ്വം.
