മലയാളത്തിന്റെ പ്രിയ താരം ദുല്‍ഖര്‍ സല്‍മാനായി ഹാന്‍ഡ് ജെസ്ചര്‍ പുറത്തിറക്കി ഡിക്യുഎഫ്( ദുല്‍ഖര്‍ സല്‍മാന്‍ ഫാമിലി). സണ്ണി വെയ്‌നും സാനിയ ഇയ്യപ്പനും ചേര്‍ന്നാണ് പ്രകാശനം നടത്തിയത്. ‘എന്റെയും നിങ്ങളുടെയും ഉള്ളില്‍ ഡിക്യു’ എന്നാണ് ഹാന്‍ഡ് ജെസ്ചര്‍ കൊണ്ട് അര്‍ത്ഥമാക്കിയിരിക്കുന്നത്. ഇന്ത്യയില്‍ ആദ്യമായാണ് ഒരു നടന്റെ പേരില്‍ ഹാന്‍ഡ് ജെസ്ചര്‍ പുറത്തിറക്കുന്നത്.
കലാപരമായി കഴിവുണ്ടായിട്ടും അത് പ്രകടിപ്പിക്കാന്‍ ഒരു വേദി ലഭിക്കാത്തതും അവഗണിക്കപ്പെടുന്നതുമായ കലാകാരന്മാര്‍ക്കായി ദുല്‍ഖര്‍ സല്‍മാന്റെ ഉടമസ്ഥതയിലുള്ള വേഫെറര്‍ ഫിലിംസ് ആരംഭിച്ചതാണ് ദുല്‍ഖര്‍ സല്‍മാന്‍ ഫാമിലി. കൊച്ചിയില്‍വച്ചു നടന്ന ചടങ്ങിലാണ് ഡിക്യുഎഫ് ഔദ്യോഗികമായി രൂപം കൊണ്ടത്. സണ്ണി വെയ്ന്‍, സാനിയ ഇയ്യപ്പന്‍, ബ്ലെസ്ലി, വിനി വിശ്വ ലാല്‍, സോഹന്‍ സീനുലാല്‍, നിത്യ മാമന്‍, രാജേഷ് കേശവ്, ബാദുഷ, തുടങ്ങി നിരവധി കലാകാരന്മാര്‍ കമ്മ്യൂണിറ്റിയില്‍ അംഗങ്ങളാണ്. പതിനായിരം കലാകാരന്മാര്‍ക്ക് മാത്രമാണ് ഇതില്‍ അംഗത്വം നല്‍കുന്നത്. ഇരുന്നൂറ് വര്‍ഷത്തോളമായി അവഗണിക്കപ്പെടുന്ന അയ്യന്തോള്‍ ദേശത്തെ പുലികളി കലാകാരന്മാര്‍ക്ക് കഴിഞ്ഞ ദിവസം ഗോള്‍ഡന്‍ മെമ്പര്‍ഷിപ്പ് നല്‍കിയിരുന്നു. കേരളത്തില്‍ ഉടനീളമുള്ള ഭിന്നശേഷിയുള്ള കുട്ടികള്‍ക്കായി ഇമ്ത്യാസ് എന്ന വ്യക്തി വികസിപ്പിച്ചെടുത്ത ഫിംഗര്‍ ഡാന്‍സ് ഡിക്യുഎഫിന്റെ മറ്റ് പ്രവര്‍ത്തനങ്ങളുടെ ഭാഗമായി ആരംഭിച്ചു കഴിഞ്ഞു.
ദുല്‍ഖര്‍ സല്‍മാന്‍ ഫാമിലിയുടെ ഭാഗമായി കേരളത്തിലെങ്ങും ചിരി സദസ്സുകള്‍ തുടങ്ങുവാനും തീരുമാനമായിട്ടുണ്ട്. ഇന്റര്‍നെറ്റിന്റെയും ജോലിതിരക്കുകളുടെയും ലോകത്ത് നിന്നും മാറി മനസ്സ് നിറഞ്ഞ് പൊട്ടിച്ചിരിക്കാനുള്ള ഒരു വേദിയാണ് ഇത് കൊണ്ട് ഉദ്ദേശിക്കുന്നത്. ഇതിന് പുറമേ ചാരിറ്റി പ്രവര്‍ത്തനങ്ങള്‍ക്കും കമ്മ്യൂണിറ്റി പ്രാധാന്യം കൊടുക്കുന്നുണ്ട്.
