കാമ്പസുകളില്‍ കലാപരമായി മികവുറ്റ് നില്‍ക്കുന്നവര്‍ക്ക് പ്രോത്സാഹനവും പിന്തുണയുമായി ദുല്‍ഖര്‍ സല്‍മാന്റെ ഉടമസ്ഥതയിലുള്ള വേഫെറര്‍ ഫിലിംസ് തുടക്കമിട്ട ദുല്‍ഖര്‍ സല്‍മാന്‍ ഫാമിലി(ഡിക്യുഎഫ്). ഇതിന്റെ ഭാഗമായി കാമ്പസുകളില്‍ ഡിക്യുഎഫ് കമ്മ്യൂണിറ്റിക്ക് തുടക്കമായി. റവന്യുമന്ത്രി കെ. രാജന്‍ ഡിക്യുഎഫ് കമ്മ്യൂണിറ്റിയുടെ ഉദ്ഘാടനം നിര്‍വഹിച്ചു. തൃശൂര്‍ കാര്‍ഷികസര്‍വകലാശാലയില്‍ നടന്ന ചടങ്ങില്‍ കയ്പമംഗലം എംഎല്‍എ ഇ.ടി. ടൈസണ്‍ മാസ്റ്റര്‍, തൃശൂര്‍ എം.എല്‍.എ പി ബാലചന്ദ്രന്‍ തുടങ്ങിയവര്‍ പങ്കെടുത്തു.
പ്രശസ്ത സംവിധായകനും നടനുമായ ടോം ഇമ്മട്ടി ആര്‍ട്‌സ് ക്ലബ് ഉദ്ഘാടനം നിര്‍വഹിച്ചു. ബിഗ് ബോസ് താരവും ഗായകനുമായ ബ്ലെസ്ലി, സിനിമാതാരവും ചിത്രകാരിയുമായ ശരണ്യ പ്രസാദ് എന്നിവര്‍ ചേര്‍ന്ന് മെമ്പര്‍ഷിപ്പ് വിതരണം നിര്‍വഹിച്ചു. കാര്‍ഷിക സര്‍വകലാശാല ആവാസ് കോളജ് യൂണിയന്‍ ചെയര്‍പേഴ്സണ്‍ ചിഞ്ചു ജയകുമാര്‍ ചടങ്ങില്‍ അധ്യക്ഷത വഹിച്ചു. കാലാവസ്ഥാ വ്യതിയാന പരിസ്ഥിതി ശാസ്ത്ര കോളേജ് ഡീന്‍ ഡോ.പി.ഒ നമീര്‍, സര്‍വകലാശാല രജിസ്ട്രാര്‍ എ. സക്കീര്‍ ഹുസൈന്‍ തുടങ്ങിയവരും ചടങ്ങില്‍ പങ്കെടുത്തു.
അടുത്തിടെയാണ് ദുല്‍ഖര്‍ സല്‍മാന്‍ ഫാമിലി കമ്മ്യൂണിറ്റിക്ക് തുടക്കം കുറിച്ചത്. കഴിവുകള്‍ ഉണ്ടായിട്ടും അത് അവതരിപ്പിക്കാന്‍ വേദി ലഭിക്കാതെ വരുന്ന കലാകാരന്മാര്‍ക്ക് പിന്തുണ നല്‍കുകയാണ് ഡിക്യുഎഫിന്റെ ലക്ഷ്യം. പതിനായിരം കലാകാരന്മാര്‍ക്കാണ് കമ്മ്യൂണിറ്റിയില്‍ അംഗത്വം നല്‍കുന്നത്. ഇതില്‍ അയ്യായിരം പേരെ കലാലയങ്ങളില്‍ നിന്ന് ഉള്‍പ്പെടുത്തും.
