ജോർജുകുട്ടിയും കുടുംബവും ഉടനെ എത്തും; ദൃശ്യം 3 പ്രഖ്യാപിച്ച് ആന്റണി പെരുമ്പാവൂർ, പ്രഖ്യാപനം മഴവിൽ അവാർഡ് വേദിയിൽ

ആരാധകർ ആകാംക്ഷയോടെയും വലിയ പ്രതീക്ഷയോടെയും കാത്തിരിക്കുന്ന ദൃശ്യം 3 ഉടൻ എത്തും. മഴവിൽ മനോരമയുടെ അവാർഡ് വേദിയിൽ ആന്റണി പെരുമ്പാവൂർ ആണ് ഇത് സംബന്ധിച്ച പ്രഖ്യാപനം നടത്തിയത്. ദൃശ്യം 3 ഉടൻ എത്തുമെന്ന് തന്നെയാണ് ആന്റണി പെരുമ്പാവൂർ വ്യക്തമാക്കിയിരിക്കുന്നത്. നടൻ ടൊവിനോ തോമസിന്റെയും രമേശ്‌ പിഷാരടിയുടെയും ചോദ്യത്തിനുള്ള മറുപടിയായാണ് ആന്റണി പെരുമ്പാവൂർ ഇക്കാര്യം അറിയിച്ചത്. എന്നാൽ ചിത്രത്തെക്കുറിച്ചുള്ള കൂടുതൽ വിവരങ്ങൾ അദ്ദേഹം വെളിപ്പെടുത്തിയിട്ടില്ല. ദൃശ്യം 3 സിനിമയുടെ പ്രാരംഭപ്രവർത്തനങ്ങൾ സംവിധായകൻ ജീത്തു ജോസഫ് തുടങ്ങിയെന്നും ആന്റണി പറഞ്ഞു.

മഴവിൽ മനോരമ അവാർഡിന്റെ പ്രമോ സോഷ്യൽ മീഡിയയി വൈറലായപ്പോൾ തന്നെ ദൃശ്യം 3 ട്വിറ്ററിൽ ട്രെൻഡിംഗ് ആയിരുന്നു. മോഹൻലാലിനെ നായകനാക്കി ജീത്തു ജോസഫ് സംവിധാനം ചെയ്ത ദൃശ്യം ഒരു മികച്ച സിനിമാനുഭവം ആയിരുന്നു പ്രേക്ഷകർക്ക് നൽകിയത്. കോവിഡിന്റെ സമയത്ത് ദൃശ്യം 2 ഒടിടി റിലീസ് ആയിരുന്നുവെങ്കിലും പ്രേക്ഷകർ ഇരുകൈയും നീട്ടി ആയിരുന്നു ചിത്രത്തെ സ്വീകരിച്ചത്. ഇപ്പോൾ ദൃശ്യം 3 എത്താൻ പോകുന്നതിന്റെ ആവേശത്തിലും സന്തോഷത്തിലുമാണ് പ്രേക്ഷകർ.

ചിത്രത്തിന്റെ രണ്ടാം ഭാഗം ഇറങ്ങിയപ്പോൾ സംവിധായകൻ ജീത്തു ജോസഫ് നേരിട്ട ചോദ്യം ദൃശ്യം 3 ഉടനുണ്ടാകുമോ എന്നായിരുന്നു. എന്നാൽ അതിന് ഉണ്ടെന്നോ ഇല്ലന്നോ ഉള്ള വ്യക്തമായ ഉത്തരം ജീത്തു ജോസഫ് നൽകിയിരുന്നില്ല. എന്നാൽ ദൃശ്യം 3 ആരാധകർ കാത്തിരുന്നതു പോലെ സഫലമാകാൻ പോകുകയാണ്. ദൃശ്യം 3ന്റെ ക്ലൈമാക്സ് തന്റെ പക്കൽ ഉണ്ടെന്ന് നേരത്തെ തന്നെ ജീത്തു ജോസഫ് പറഞ്ഞിരുന്നു. ദൃശ്യം 2 റിലീസിന് ശേഷം നടത്തിയ വാർത്താസമ്മേളനത്തിൽ ദൃശ്യം 3 ന്റെ സാധ്യതകളെക്കുറിച്ചും ജീത്തു ജോസഫ് പറഞ്ഞിരുന്നു.
നല്ലൊരു ഐഡിയ കിട്ടിയാൽ മാത്രമേ ദൃശ്യം 3 ചെയ്യുകയുള്ളൂവെന്നും ബിസിനസ് സാധ്യത മാത്രം നോക്കി ദൃശ്യം 3 ചെയ്യില്ലെന്നും ജീത്തു വ്യക്തമാക്കിയിരുന്നു. ദൃശ്യത്തിന്റെ ആദ്യഭാഗം ഇറങ്ങി എട്ടു വർഷങ്ങൾക്ക് ശേഷമായിരുന്നു ദൃശ്യം 2 ഇറങ്ങിയത്. എന്നാൽ, ദൃശ്യം 3ക്ക് വേണ്ടി ഇത്രയും നീണ്ട കാത്തിരിപ്പ് പ്രേക്ഷകർ നടത്തേണ്ടതില്ലെന്ന് വ്യക്തമായിരിക്കുകയാണ്. മോഹൻലാലിന് ഒപ്പം മീന, അൻസിബ, എസ്തർ, ആശ ശരത്, സിദ്ദിഖ്, മുരളി ഗോപി തുടങ്ങി വലിയ താരനിരയാണ് ദൃശ്യത്തിലുള്ളത്.