മലയാള സിനിമയ്ക്ക് അഭിമാനമായി ദൃശ്യം2. പ്രമുഖ സിനിമ വെബ്‌സൈറ്റായ ഐഎംഡിബിയില്‍ ലോകത്തിലെ തന്നെ ‘മോസ്റ്റ് പോപ്പുലര്‍’ സിനിമകളുടെ പട്ടികയില്‍ ഇടംനേടിയിരിക്കുകയാണ് ചിത്രം. നൂറ് സിനിമകളുളള പട്ടികയില്‍ ഏഴാം സ്ഥാനത്താണ് ദൃശ്യം 2. ഈ പട്ടികയിലുള്ള ഏക ഇന്ത്യന്‍ സിനിമ കൂടിയാണ് ദൃശ്യം 2.
റിലീസിനൊരുങ്ങുന്നതും റിലീസ് കഴിഞ്ഞതുമായ ലോകമൊട്ടാകെയുള്ള പ്രേക്ഷകര്‍ ചര്‍ച്ച ചെയ്യുന്ന സിനിമകളാണ് ഈ പട്ടികയില്‍ ഉള്ളത്. ഹോളിവുഡ് സിനിമകളായ ഐ കെയര്‍ എ ലോട്ട്, മോര്‍ടല്‍ കോംപാട്, നോമാഡ്ലാന്‍ഡ്, ആര്‍മി ഓഫ് ദ് ഡെഡ്, ടോം ആന്‍ഡ് ജെറി, ജസ്റ്റിസ് ലീഗ്, മോണ്‍സ്റ്റര്‍ ഹണ്ടര്‍, ദ് ലിറ്റില്‍ തിങ്‌സ് എന്നീ വമ്പന്‍ സിനിമകള്‍ക്കൊപ്പമാണ് ദൃശ്യം 2 ഇടംനേടിയിരിക്കുന്നത്. ഇന്ത്യയില്‍ മാത്രമല്ല ലോകമൊട്ടാകെയാണ് ദൃശ്യം 2വിനു സ്വീകാര്യത നേടിയിരിക്കുന്നത്.
8.8 ആണ് ഐഎംഡിബി ഉപഭോക്താക്കളുടെ വോട്ടില്‍ ദൃശ്യം 2വിന്റെ റേറ്റിങ്. ഇതില്‍ തന്നെ 11450 പേര്‍ ചിത്രത്തിന് പത്തില്‍ പത്തും നല്‍കി. ലോകത്തെ വിവിധ സ്ഥലങ്ങളില്‍ നിന്നും ചിത്രത്തിനു ലഭിച്ച വോട്ടിങ് ആണ് റേറ്റിങ് കൂടാന്‍ കാരണമായത്. ഇതിന്റെ ഭാഗമായി ഐഎംഡിബി ടീം മോഹന്‍ലാലുമായി പ്രത്യേക അഭിമുഖം നടത്തിയിരുന്നു. ഇതുകൂടാതെ ടോപ്പ് റേറ്റഡ് ഇന്ത്യന്‍ സിനിമകളുടെ പട്ടികയില്‍ ദൃശ്യം 2 ഇപ്പോള്‍ രണ്ടാമത് എത്തിയിരിക്കുന്നു. പാഥേര്‍ പാഞ്ചാലിയാണ് 8.5 റേറ്റിങോടെ മുമ്പില്‍ നില്‍ക്കുന്നത്.
