മനോഹരമായ പ്രണയകഥ പറഞ്ഞ ചിത്രമായിരുന്നു ദുൽഖർ സൽമാൻ നായകനായി എത്തിയ സീതാരാമം. ചിത്രത്തിൽ മൃണാൾ താക്കൂർ ആയിരുന്നു സിതാ മഹാലക്ഷ്മിയെന്ന നായിക കഥാപാത്രത്തെ അവതരിപ്പിച്ചത്. ഇരുവരും ഒരുമിച്ച് എത്തിയ ആദ്യ ചിത്രമായിരുന്നു ഇത്. ഏതായാലും പ്രേക്ഷകരുടെ ഇഷ്ട ജോഡിയായി മാറിയിരിക്കുകയാണ് ദുൽഖറും മൃണാളും. പ്രേക്ഷകർക്ക് സന്തോഷം നൽകുന്ന ഒരു വാർത്തയാണ് ഇപ്പോൾ പുറത്തു വരുന്നത്.
ദുൽഖർ സൽമാനും മൃണാൾ താക്കൂറും പുതിയൊരു ചിത്രത്തിനു വേണ്ടി വീണ്ടും ഒരുമിക്കുമെന്ന വാർത്തയാണ് ഇപ്പോൾ പുറത്തു വരുന്നത്. സിതാരാമത്തിന്റെ സംവിധായകൻ ആയ ഹനു രാഘവപുടി തന്നെ സംവിധാനം ചെയ്യുന്ന തെലുങ്ക് ചിത്രത്തിൽ ആയിരിക്കും ഇരുവരും വീണ്ടുമെത്തുക എന്നാണ് റിപ്പോർട്ടുകൾ. ഇന്ത്യ ടുഡേയാണ് ഈ വാർത്ത റിപ്പോർട്ട് ചെയ്തിരിക്കുന്നത്.
സിതാരാമം ചിത്രത്തിന്റെ നിർമാതാവായ അശ്വനി ദത്ത് തന്നെയാവും ഈ ചിത്രവും പ്രൊഡ്യൂസ് ചെയ്യുക. എന്നാൽ, ഇതു സംബന്ധിച്ച ഔദ്യോഗിക വിശദീകരണങ്ങളൊന്നും പുറത്തു വന്നിട്ടില്ല. തിയറ്ററുകളിൽ റിലീസ് ചെയ്ത് സൂപ്പർ ഹിറ്റ് ആയി മാറിയ സീതാരാമം സെപ്റ്റംബർ പതിനൊന്നിനാണ് ആമസോൺ പ്രൈമിൽ റിലീസ് ചെയ്തത്. രശ്മിക മന്ദാന, ഗൗതം വാസുദേവ് മേനോൻ, സുമന്ത്, പ്രകാശ് രാജ്, ഭൂമിക ചൗള തുടങ്ങിയവരാണ് മറ്റ് പ്രധാന കഥാപാത്രങ്ങളെ അവതരിപ്പിച്ചത്.
