മലയാളികളുടെ പ്രിയനടന്‍ ദുല്‍ഖര്‍ സല്‍മാന്‍ ഇപ്പോള്‍ തമിഴ്, ഹിന്ദി, തെലുങ്കു പ്രേക്ഷകരുടേയും പ്രിയതാരമാണ്. മലയാളത്തില്‍ റോഷന്‍ ആന്‍ഡ്രൂസിന്റെ സല്യൂട്ട്, തമിഴില്‍ ബ്രിന്ദ മാസ്റ്റര്‍ ഒരുക്കിയ ഹേ സിനാമിക, ഹിന്ദിയില്‍ ആര്‍ ബാല്‍കി ഒരുക്കിയ ചുപ്, തെലുങ്കില്‍ പേരിടാത്ത റൊമാന്റിക് ചിത്രം എന്നിവയാണ് ദുല്‍ഖറിന്റെ പുറത്തിറങ്ങാനിരിക്കുന്ന ചിത്രങ്ങള്‍. ആരാധകരും ഏറെ പ്രതീക്ഷയോടെയാണ് ഈ ചിത്രം കാത്തിരിക്കുന്നത്. ആരാധകരെ ആവേശത്തിലാക്കി മറ്റൊരു വമ്പന്‍ വാര്‍ത്തയാണ് പുറത്തു വരുന്നത്. ദുല്‍ഖര്‍ സല്‍മാന്‍ വെബ് സീരിസിലും അരങ്ങേറ്റം കുറിക്കുകയാണ് എന്ന വാര്‍ത്തയാണത്. നെറ്റ്ഫ്‌ലിക്‌സിലാണ് ഈ വെബ് സീരിസ് വരിക എന്നാണ് റിപ്പോര്‍ട്ടുകള്‍.
അതേ സമയം ആമസോണ്‍ പ്രൈമിലെ സൂപ്പര്‍ ഹിറ്റ് വെബ് സീരിസ് ആയ ഫാമിലി മാന്‍ ഒരുക്കിയ രാജ്- ഡി കെ ടീം ആണ് ഈ വെബ് സീരിസ് ഒരുക്കുന്നത്. സീരിസിന്റെ ചിത്രീകരണം നിലവില്‍ ഡെറാഡൂണില്‍ പുരോഗമിക്കുകയാണ്. മാര്‍ച്ച് അവസാനത്തോടെ സീരിസിന്റെ ചിത്രീകരണം പൂര്‍ത്തിയായേക്കും.
ബോളിവുഡ് താരങ്ങളായ രാജ്കുമാര്‍ റാവു, ആദര്‍ശ് ഗൗരവ് എന്നിവരും ഇതില്‍ അഭിനയിക്കുന്നുണ്ട്. കോമഡി ത്രില്ലറാണ് സീരീസ്. നേരത്തെ പ്രശസ്ത നടനായ ദില്‍ജിത്ത് ദോസാഞ്ചിനെയായിരുന്നു ഈ സീരിസില്‍ ദുല്‍ഖര്‍ ചെയ്യുന്ന വേഷത്തിലേക്ക് പരിഗണിച്ചിരുന്നത്. എന്നാല്‍ ദില്‍ജിത് ഡേറ്റ് ക്ലാഷുകള്‍ കാരണം പിന്മാറിയപ്പോള്‍ ദുല്‍ഖറിന് നറുക്ക് വീഴുകയായിരുന്നു.
