കള്ളപ്പണം വെളുപ്പിക്കലിന് പിടിയിലായ സച്ചിൻ സാവന്തുമായി ബന്ധമുണ്ടെന്ന കാരണത്താൽ നടി നവ്യ നായരെ ഇ ഡി ചോദ്യം ചെയ്തു. അനധികൃത സ്വത്ത് സമ്പാദനക്കേസിൽ പ്രതിയായ സച്ചിൻ സാവന്തുമായി നവ്യയ്ക്ക് സൗഹൃദം ഉണ്ടെന്ന് കണ്ടെത്തിയതിനെ തുടർന്നാണ് നടിയെ ഇ ഡി ചോദ്യം ചെയ്തത്. സച്ചിൻ സാവന്തിൽ നിന്ന് നടി നവ്യ നായർ വിലകൂടിയ ആഭരണങ്ങൾ സമ്മാനമായി കൈപ്പറ്റിയെന്ന് കണ്ടെത്തിയതിനെ തുടർന്നാണ് നടിയെ എൻഫോഴ്സ്മെന്റ് ഡയറക്ടറേറ്റ് ചോദ്യം ചെയ്തത്. സച്ചിൻ സാവന്ത് നടിക്ക് വില കൂടിയ സ്വർണാഭരണങ്ങളും സമ്മാനങ്ങളും നൽകിയെന്ന് ചോദ്യം ചെയ്യലിൽ വ്യക്തമായെന്ന് ഇ ഡി സമർപ്പിച്ച കുറ്റപത്രത്തിൽ പറയുന്നു.
അതേസമയം, തങ്ങൾ സുഹൃത്തുക്കളായിരുന്നെന്നും സൗഹൃദത്തിന്റെ പേരിൽ നൽകിയ സമ്മാനങ്ങൾ സ്വീകരിച്ചതല്ലാതെ മറ്റൊന്നിലും പങ്കാളിയല്ലെന്നുമാണ് നവ്യ നായർ ഇഡിക്ക് നൽകിയ മൊഴി. കഴിഞ്ഞ ദിവസം ഇ ഡി സമർപ്പിച്ച കുറ്റപത്രത്തിൽ നവ്യയെ കൊച്ചിയിൽ സച്ചിൻ സന്ദർശിച്ചിട്ടുണ്ടെന്നും പരാമർശിക്കുന്നുണ്ട്. ലഖ്നൗവിൽ കള്ളപ്പണക്കേസിൽ ജൂണിലാണ് സച്ചിൻ സാവന്തിനെ ഇ ഡി അറസ്റ്റ് ചെയ്തത്. മുംബൈയിൽ എൻഫോഴ്സ്മെന്റ് ഡയറക്ടറേറ്റിൽ ഡെപ്യൂട്ടി ഡയറക്ടർ ആയിരിക്കെ സച്ചിൻ സാവന്ത് വരവിൽ കവിഞ്ഞ സ്വത്ത് സമ്പാദിച്ചെന്ന കണ്ടെത്തലിനെ തുടർന്നാണിത്. ബെനാമി സ്വത്തും ഇദ്ദേഹത്തിന് പങ്കാളിത്തമുള്ള സ്ഥാപനങ്ങളും അന്വേഷണത്തിൽ കണ്ടെത്തിയിരുന്നു.
എന്നാൽ, ഐ ആർ എസ് ഉദ്യേഗസ്ഥൻ സച്ചിൻ സാവന്തിനെ ഒരേ റെസിഡൻഷ്യൽ ഏരിയയിലെ താമസക്കാർ എന്ന നിലയിൽ പരിചയമുണ്ടെന്ന് നടി നവ്യ നായരുടെ കുടുംബം പറഞ്ഞു. ഗുരുവായൂർ ക്ഷേത്രം സന്ദർശിക്കുന്നതിനായി അദ്ദേഹത്തിന് പലവട്ടം സൗകര്യം ചെയ്തു കൊടുത്തിട്ടുണ്ട്. നവ്യയുടെ മകന്റെ ജന്മദിനത്തിനു സച്ചിൻ സമ്മാനം നൽകിയിട്ടുണ്ട്. അതേസമയം നവ്യയ്ക്ക് ഉപഹാരങ്ങളൊന്നും നൽകിയിട്ടില്ലെന്നും ഇക്കാര്യങ്ങളെല്ലാം ഇഡിയെ അറിയിച്ചിട്ടുണ്ടെന്നും കുടുംബം പറഞ്ഞു.
