കഴിഞ്ഞയിടെ ആയിരുന്നു നടിയും മോഡലുമായ അമേയ മാത്യുവിന്റെ വിവാഹം നിശ്ചയിച്ചത്. വിവാഹം നിശ്ചയിച്ച ചിത്രം സോഷ്യൽ മീഡിയയിൽ പങ്കുവെച്ച അമേയ മാത്യു വരന്റെ മുഖം വെളിപ്പെടുത്തിയിരുന്നില്ല. കഴിഞ്ഞദിവസം തന്റെ പിറന്നാൾ ദിനത്തിൽ വരന്റെ മുഖം അമേയ വെളിപ്പെടുത്തിയിരുന്നു. തന്റെ ഇൻസ്റ്റഗ്രാം അക്കൗണ്ടിൽ കൂടിയാണ് അമേയ വരന്റെ മുഖം വെളിപ്പെടുത്തിയിരിക്കുന്നത്.
‘ഇത്രയും കാലം ആഘോഷിച്ച എന്റെ ബര്‍ത്ത്‌ഡേകളില്‍ ഈ ബര്‍ത്ത്‌ഡേ മാത്രം എനിക്ക് വളരെ സ്‌പെഷ്യല്‍ ആയിരുന്നു. അതിന്റെ കാരണം, ഈ ബര്‍ത്ത്‌ഡേ മുതല്‍ എന്റെ ലൈഫില്‍ മറ്റൊരാള്‍ കൂടി കടന്നു വരുകയാണ്’ – എന്ന് കുറിച്ചാണ് അമേയ മാത്യു ചിത്രങ്ങൾ പങ്കുവെച്ചത്. പിറന്നാള്‍ ദിവസം വരനെ പരിചയപ്പെടുത്താന്‍ കാത്തിരിക്കുകയായിരുന്നെന്നാണ് അമേയ പറയുന്നത്. തന്നെ പൂര്‍ണതയിലേക്ക് കൊണ്ടെത്തിക്കുന്ന വ്യക്തിയാണ് ഇദ്ദേഹമെന്ന് കുറിച്ചാണ് അമേയ പ്രതിശ്രുതവരനായ കിരണ്‍ കട്ടിക്കാരനെ പരിചയപ്പെടുത്തിയത്. ഏതായാലും രസകരമായ കമന്റുകളാണ് അമേയയ്ക്ക് കമന്റ് ബോക്സിൽ ലഭിച്ചിരിക്കുന്നത്. അടിപൊളി ആയിട്ടുണ്ടെന്നും ഇനി ലൈക്ക് കുറയുമെന്നും ആരാധകർ ശാന്തരായെന്നുമായിരുന്നു ഒരു കമന്റ്.
‘കരിക്ക്’ വെബ് സീരീസിലൂടെയാണ് തിരുവനന്തപുരം സ്വദേശിയായ അമേയ ശ്രദ്ധ നേടിയത്. ആട് 2, ദി പ്രീസ്റ്റ്, തിരിമം, വുള്‍ഫ് എന്നീ ചിത്രങ്ങളിലും അഭിനയിച്ചിട്ടുണ്ട്. ഖജുരാഹോ ഡ്രീംസ് ആണ് ഇനി അമേയയുടെതായി ഇനി റിലീസിന് ഒരുങ്ങുന്നത്.
