മലയാളത്തിന്റെ പ്രിയ താരങ്ങളാണ് നസ്രിയയും ഫഹദ് ഫാസിലും. ഇരുവരും ഒരുമിച്ചുള്ള ഒരു വിഡിയോയാണ് ഇപ്പോള്‍ വൈറലാകുന്നത്. പരസ്പരം കലഹിക്കുന്ന ഫഹദിനേയും നസ്രിയയേയും വിഡിയോയില്‍ കാണാം. വിഡിയോയുടെ അവസാനം ഫഹദിനോട് ദേഷ്യപ്പെട്ട് വാതില്‍ കൊട്ടിയടച്ചുപോകുന്ന നസ്രിയയേയാണ് കാണുന്നത്.
View this post on Instagram
‘ലവ് ഹാസ് മെനി ഫ്‌ളേവേഴ്‌സ്’ എന്ന ക്യാപ്ഷനോടെ നസ്രിയ തന്നെയാണ് വിഡിയോ ഇന്‍സ്റ്റഗ്രാമിലൂടെ പങ്കുവച്ചത്. ഇരുവരും കാറില്‍ ഇരുന്ന് സംസാരിക്കുന്നിടത്തു നിന്നാണ് വിഡിയോ തുടങ്ങുന്നത്. തുടര്‍ന്ന് വഴക്കിട്ട് പുറത്തേക്കിറങ്ങുന്ന നസ്രിയയെ കാണാം. പിന്നാലെ ഫഹദും പോകുന്നു. ഒടുവില്‍ അവരുടെ സംസാരം കൂടുതല്‍ കയര്‍ക്കുകയും നസ്രിയ മുറിവിട്ടുപോകുകയുമാണ്. സംഭവം എന്താണെന്ന് ആര്‍ക്കും പിടികിട്ടിയിട്ടില്ല. ബാംഗ്ലൂര്‍ ഡേയ്‌സ് 2 ആണോ, വെബ് സീരിസാണോ തുടങ്ങിയ ചോദ്യങ്ങളുമായി നിരവധി പേരാണ് വിഡിയോയ്ക്ക് താഴെ കമന്റ് ചെയ്തിരിക്കുന്നത്. ഐസ്‌ക്രീമിന്റെ പരസ്യമാണിതെന്നാണ് സൂചന.
2014 ഓഗസ്റ്റ് 21 നായിരുന്നു ഫഹദ് ഫാസിലും നസ്രിയയും തമ്മിലുള്ള വിവാഹം. ഇരുവരും ഒന്നിച്ചഭിനയിച്ച അഞ്ജലി മേനോന്‍ സംവിധാനം ചെയ്ത ബാംഗ്ലൂര്‍ ഡെയ്‌സ് പുറത്തിറങ്ങിയതിന് പിന്നാലെയായിരുന്നു വിവാഹം. വിവാഹശേഷം അഭിനയത്തില്‍ നിന്നും ചെറിയ ഇടവേളയെടുത്ത നസ്രിയ 2018 ല്‍ അഞ്ജലി മേനോന്‍ തന്നെ സംവിധാനം ചെയ്ത കൂടെ എന്ന ചിത്രത്തിലൂടെ വീണ്ടും തിരിച്ചെത്തി. 2019 ല്‍ പുറത്തിറങ്ങിയ അന്‍വര്‍ റഷീദ് സംവിധാനം ചെയ്ത ട്രാന്‍സില്‍ ഫഹദിന്റെ നായികയായി എത്തിയത് നസ്രിയയായിരുന്നു. നാനി നായകനായി എത്തിയ ആണ്ടേ സുന്ദരാനികി എന്ന ചിത്രത്തിലാണ് നസ്രിയ ഒടുവില്‍ അഭിനയിച്ചത്.
