ആരാധകന്റെ ചോദ്യത്തിന് കുറിക്ക് കൊള്ളുന്ന മറുപടിയുമായി അശ്വതി ശ്രീകാന്ത്

വ്യത്യസ്തമാര്‍ന്ന അവതരണ ശൈലിയുമായിട്ടാണ് അശ്വതി ശ്രീകാന്ത് പ്രേക്ഷകരുടെ മനം കവർന്നത്. മിനിസ്‌ക്രീന്‍ പ്രേക്ഷകരുടെ പ്രിയപ്പെട്ട അവതാരകമാരിലൊരാള്‍ കൂടിയാണ് അശ്വതി. കോമഡി സൂപ്പര്‍നൈറ്റ് എന്ന ചാനല്‍ പരിപാടിയിലൂടെയാണ് അശ്വതി ശ്രദ്ധിക്കപെടുന്നത്. അശ്വതി റൗണ്ട് എന്ന പേരില്‍ ആരംഭിച്ച രസകരമായ ചോദ്യോത്തര പരിപാടി ഏറെ തരംഗമായിരുന്നു. സോഷ്യല്‍ മീഡിയയില്‍ സജീവമായിരിക്കുന്ന നടി രസകരമായ പല കാര്യങ്ങളും തുറന്ന് പറയാറുണ്ട്. ടെലിവിഷന്‍ പരിപാടികള്‍ക്ക് പുറമേ നിരവധി സ്റ്റേജ് പ്രോഗ്രാമുകള്‍ക്കും അശ്വതി അവതാരകയായിട്ട് എത്താറുണ്ട്.

സോഷ്യൽ മീഡിയയിൽ ഏറെ സജീവമായ അശ്വതിയുടെ ഫോട്ടോകൾക്കും ക്യാപ്ഷനുകൾക്കും നിരവധി ആരാധകരാണ് ഉള്ളത്. തന്റെ പോസ്റ്റിന് കമന്റിടുന്ന ആരാധകര്‍ക്ക് മറുപടി കൊടുക്കാനും അശ്വതി തയ്യാറാവാറുണ്ട്. ചിലപ്പോള്‍ കുറിക്ക് കൊള്ളുന്ന റിപ്ലേ കണ്ട് ആരാധകരും ഞെട്ടാറുണ്ട്. സമാനമായൊരു സംഭവമാണ് ഇപ്പോള്‍ നടന്നിരിക്കുന്നത്. അശ്വതി മകള്‍ പത്മയ്ക്കും കൂട്ടുകാരിയുടെ മകള്‍ പ്രാര്‍ഥനയ്ക്കുമൊപ്പം നില്‍ക്കുന്ന ഫോട്ടോയായിരുന്നു പോസ്റ്റ് ചെയ്തത്. ‘രണ്ട് ചുന്നരി പെണ്ണുങ്ങളേം കൊണ്ട് ഫ്രോസണ്‍ 2 കാണാന്‍ പോവ്വാ’ എന്ന ക്യാപ്ഷനും കൊടുത്തിരുന്നു. ഇതിന് താഴെ നിരവധി കമന്റുകളുണ്ട്. അതിലൊന്ന് ഇപ്പോള്‍ തടി അല്‍പ്പം കൂടിയോ എന്നായിരുന്നു. നിങ്ങള്‍ അല്ലല്ലോ എനിക്ക് റേഷന്‍ വാങ്ങി തരുന്നത്. അത് കൊണ്ട് വിഷമിക്കണ്ടെന്ന് പറഞ്ഞ് ആരാധകന്റെ കമന്റിന് അതേ നാണയത്തില്‍ തന്നെ അശ്വതി ഉത്തരവും കൊടുത്തു.