പത്ത് വര്‍ഷത്തെ കാത്തിരിപ്പിനാടുവിലാണ് സ്റ്റെഫിയുമായുള്ള വിവാഹമെന്ന് സംവിധായകനും നടനുമായുള്ള സോഹന്‍ സീനുലാല്‍. സ്റ്റെഫിയെ പരിചയപ്പെടുമ്പോള്‍ തനിക്ക് 32വയസായിരുന്നു പ്രായം. സ്റ്റെഫിയുമായി പ്രണയത്തിലാകും വരെ കല്യാണം വേണോ വേണ്ടയോ എന്നൊക്കെയുള്ള ആശങ്കയുണ്ടായിരുന്നുവെന്നും സോഹന്‍ പറഞ്ഞു.
സെന്റ് തെരേസാസ് വിദ്യാര്‍ത്ഥിനിയായിരുന്ന സ്റ്റെഫിയെ അവിടെ ഒരു പരിപാടിക്ക് പോയപ്പോഴാണ് പരിചയപ്പെട്ടത്. അതൊരു നല്ല സൗഹൃദത്തിന്റെ തുടക്കമായിരുന്നു. പിന്നീട് തന്റെ സിനിമകള്‍ക്ക് സ്റ്റെഫിയും സുഹൃത്തുക്കളുമെല്ലാം സഹായങ്ങളുമായി ഒപ്പമുണ്ടായിരുന്നു. ഇത്രയും സൗഹൃദത്തിലായ രണ്ട് പേര്‍ക്ക് എന്തുകൊണ്ട് വിവാഹം കഴിച്ചുകൂട എന്ന ചിന്ത പിന്നീടുണ്ടായി. ഇതിനിടെ സ്റ്റെഫി കാനഡില്‍ പോയി പിജി ചെയ്തു. മടങ്ങിയെത്തിയപ്പോഴായിരുന്നു കൊവിഡ് പ്രതിസന്ധി ആരംഭിക്കുന്നത്. ഇതോടെ തിരിച്ചു പോകാന്‍ സാധിച്ചില്ല. എന്നാല്‍ കല്യാണം നടക്കട്ടെ എന്ന് തീരുമാനിക്കുകയായിരുന്നുവെന്നും സോഹന്‍ പറഞ്ഞു.
വീട്ടുകാരോട് പറഞ്ഞപ്പോള്‍ അവരും വിവാഹത്തിന് തയ്യാറായിരുന്നു. തങ്ങള്‍ക്കിടയില്‍ മതത്തിന്റേയോ ജാതിയുടേയോ പ്രശ്നങ്ങളൊന്നുമുണ്ടായിരുന്നില്ല. പള്ളിയില്‍ വച്ച് മോതിരം മാറിയ ശേഷം തന്റെ വീട്ടില്‍ പായസം കൂട്ടിയുള്ള ഊണ്. മതത്തിനപ്പുറം രണ്ട് കുടുംബങ്ങള്‍ തങ്ങളുടെ ഇഷ്ടത്തിനൊപ്പം നില്‍ക്കുന്നത് അനുഭവിക്കാനായെന്നും സോഹന്‍ പറയുന്നു.
