‘ടിക്ടോക് ചെറുതായിട്ട് മിസ് ചെയ്യും’ ചൈനീസ് ആപ്പുകൾ നിരോധിക്കുന്നതിനെ കുറിച്ച് ടിക് ടോക് സ്റ്റാർ ഫുക്രൂ

ടിക്ടോക് അടക്കം നിരവധി ചൈനീസ് ആപ്പുകൾ ഇന്നലെ ഇന്ത്യയിൽ നിരോധിച്ചിരുന്നു. പല ടിക്ടോക് താരങ്ങൾക്കും ഇതൊരു തിരിച്ചടിയായിരുന്നു. ടിക് ടോക് വീഡിയോകളിലൂടെ വൈറലായ ഫുക്രു ഇപ്പോൾ ഈ വിഷയത്തിൽ പ്രതികരണവുമായി എത്തിയിരിക്കുകയാണ്. രാജ്യസുരക്ഷാക്കയതുകൊണ്ട് തന്നെ ബാൻ മാറ്റണമെന്ന് വാദിക്കാനൊന്നും ഇല്ലെന്ന് പറയുകയാണ് ഫുക്രു.

കൊല്ലം കൊട്ടാരക്കര സ്വദേശി കൃഷ്ണജീവ് എന്ന് പറഞ്ഞാൽ ചിലപ്പോൾ ആളെ മനസ്സിലാകില്ല എങ്കിലും ഫുക്രു എന്ന് പറഞ്ഞാൽ കേരളത്തിലെ ഒട്ടുമിക്ക ആളുകൾക്കും മനസ്സിലാകും. ഫുക്രുവിനെ കേരളം അറിയുന്ന ഒരു സ്റ്റാർ ആക്കി മാറ്റിയത് ടിക്ടോക്ക് ആയിരുന്നു. ഇപ്പോൾ രസകരമായ ഒരു വീഡിയോ പങ്കുവെച്ചുകൊണ്ട് ടിക് ടോക്കിന് ബൈ പറയുകയാണ് ഫുക്രു. ചൈനീസിലുള്ള സംഭാഷണത്തിന് മലയാളം സബ്ടൈറ്റിൽ നൽകി ഒരുക്കിയിരിക്കുന്ന വിഡിയോ ഏറെ ശ്രദ്ധനേടിയിട്ടുണ്ട്. ചൈനീസ് ആപ്പുകൾ നിരോധിച്ച എന്തെങ്കിലും മിസ്സ് ചെയ്യുമോ എന്ന ചോദ്യത്തിന് മറുപടി ആയിട്ടാണ് ഫുക്രു ഈ വീഡിയോ അപ്‌ലോഡ് ചെയ്തിരിക്കുന്നത്. ‘ടിക്ടോക്, ചെറുതായിട്ട്’ എന്നാണ് ഫുക്രുവിന്റെ ഉത്തരം. പിന്നീട് സ്വതസിദ്ധമായ ശൈലിയിൽ ‘ബൈ’ പറഞ്ഞുപോകുന്നു.

അദൃശ്യമായ ഒരുപാട് തടസ്സങ്ങൾ നീക്കി എളിയ ശ്രമങ്ങളിലൂടെ നിങ്ങളെ രസിപ്പിക്കാൻ ടിക്ടോക് ഞങ്ങളിൽ ചിലരെ സഹായിച്ചു എന്നെഴുതിയാണ് വിഡിയോ അവസാനിക്കുന്നത്. ടിക് ടോകിലൂടെ ശ്രദ്ധേയനായ ഫുക്രു പിന്നീട് മോഹൻലാൽ അവതാരകനായി എത്തിയ ഏഷ്യാനെറ്റിൽ സംപ്രേഷണം ചെയ്തു വന്നിരുന്ന ബിഗ് ബോസ് സീസൺ ടു എന്ന പരിപാടിയിലൂടെ വീണ്ടും പ്രേക്ഷകരുടെ ഇഷ്ടം പിടിച്ചുപറ്റിയിരുന്നു.