സിനിമാപ്രേമികൾ ആകാംക്ഷയോടെ കാത്തിരിക്കുന്ന ചിത്രമാണ് ‘തല്ലുമാല’. ഓഗസ്റ്റ് 12ന് റിലീസ് ചെയ്യുന്ന ചിത്രത്തിന്റെ പ്രി ബുക്കിങ്ങ് കഴിഞ്ഞദിവസം ആയിരുന്നു ആരംഭിച്ചത്. അണിയറപ്രവർത്തകരെ പോലും ഞെട്ടിച്ച് വളരെ പെട്ടെന്നാണ് ടിക്കറ്റുകൾ വിറ്റഴിഞ്ഞത്. ഏതായാലും സിനിമ റിലീസ് ചെയ്യുന്നതിനു മുമ്പ് തന്നെ ചിത്രത്തിനായി സ്പെഷ്യൽ ഷോകളുടെ ബുക്കിംഗും ആരംഭിച്ചു. ഏതായാലും മുമ്പെങ്ങും കാണാത്ത വിധത്തിലുള്ള പ്രേക്ഷക പ്രതികരണമാണ് തല്ലുമാലയുടെ പ്രി ബുക്കിങ്ങിന് ആരംഭിച്ചത്.
പ്രി ബുക്കിംഗ് തുടങ്ങി ആദ്യ മണിക്കൂറുകൾക്കുള്ളിൽ തന്നെ നിരവധി തിയറ്ററുകളിൽ ആദ്യ ദിവസത്തെ മുഴുവൻ ടിക്കറ്റുകളും വിറ്റുപോയി. റിലീസിന് രണ്ട് ദിവസമുള്ളപ്പോള്‍ തന്നെ ചിത്രത്തിനായി സ്പെഷ്യല്‍ ഷോകള്‍ വരെ ഉള്‍പെടുത്തി തുടങ്ങി. സോഷ്യൽ മീഡിയയിലും ചിത്രത്തിന് വമ്പൻ ഹൈപ്പ് ആണ് ലഭിക്കുന്നത്. കഴിഞ്ഞദിവസം തല്ലുമാല സിനിമയുടെ പ്രമോഷനായി കോഴിക്കോട് ഹൈലൈറ്റ് മാളിൽ എത്തിയ ടൊവിനോയ്ക്ക് അവിടുത്തെ തിരക്ക് കാരണം പ്രമോഷൻ പരിപാടി നടത്താൻ കഴിഞ്ഞിരുന്നില്ല.
കേരളത്തില്‍ ബുക്കിങ് ആരംഭിക്കുന്നതിന് മുമ്പ് തന്നെ ഗള്‍ഫ് രാജ്യങ്ങളിലും ചിത്രത്തിന്റെ ബുക്കിങ് ആരംഭിച്ചിരുന്നു. മികച്ച പ്രതികരണമാണ് ഗള്‍ഫ് ബുക്കിങ്ങിലും ചിത്രത്തിന് ലഭിച്ചത്. അഡ്വാന്‍സ് ബുക്കിങിലെ മികച്ച പ്രതികരണം ചിത്രത്തിന്റെ ആദ്യദിന കളക്ഷനും മികച്ച രീതിയിലാക്കുമെന്നാണ് മൂവി അനലിസ്റ്റുകള്‍ നിരീക്ഷിക്കുന്നത്. ഖാലിദ് റഹ്മാൻ സംവിധാനം ചെയ്യുന്ന ചിത്രത്തിന് സെന്‍സറിങ് പൂര്‍ത്തിയായപ്പോള്‍ ക്ലീന്‍ യു/എ സര്‍ട്ടിഫിക്കറ്റാണ് ലഭിച്ചത്. ആഷിക് ഉസ്മാന്‍ പ്രൊഡക്ഷന്‍സിന്റെ ബാനറില്‍ ആഷിക് ഉസ്മാനാണ് ചിത്രം നിര്‍മിക്കുന്നത്. മുഹ്സിന്‍ പരാരിയാണ് ചിത്രത്തിന് തിരക്കഥ എഴുതിയിരിക്കുന്നത്. കല്യാണി പ്രിയദർശൻ, ഷൈൻ ടോം ചാക്കോ എന്നിവരാണ് ടൊവിനോയ്ക്ക് ഒപ്പം ചിത്രത്തിൽ പ്രധാനവേഷങ്ങളിൽ എത്തുന്നത്. കലാ സംവിധാനം ഗോകുല്‍ ദാസ്, ശബ്ദ മിശ്രണം വിഷ്ണു ഗോവിന്ദ് ശ്രീ ശങ്കര്‍, മേക്കപ്പ് റോണക്‌സ് സേവ്യര്‍, വസ്ത്രാലങ്കാരം മഷര്‍ ഹംസ, ചീഫ് അസ്സോസിയേറ്റ് റഫീക്ക് ഇബ്രാഹിം, ശില്‍പ അലക്സാണ്ടര്‍, പ്രൊഡക്ഷന്‍ കണ്‍ട്രോളര്‍ സുധര്‍മ്മന്‍ വള്ളിക്കുന്ന്, സ്റ്റില്‍സ് ജസ്റ്റിന്‍ ജെയിംസ്, വാര്‍ത്താപ്രചാരണം എ.എസ്. ദിനേശ്, പോസ്റ്റര്‍ ഓള്‍ഡ്മോങ്ക്‌സ്, മാര്‍ക്കറ്റിങ് ഒബ്സ്‌ക്യൂറ, ഡിസൈനിങ്- പപ്പെറ്റ് മീഡിയ.
