ദുല്‍ഖര്‍ സല്‍മാന്‍ നായകനാകുന്ന തമിഴ് ചിത്രം ഹേ സിനാമികയിലെ ഗാനം നാളെ റിലീസ് ചെയ്യും. ദുല്‍ഖറിനൊപ്പം അദിതി റാവുവും അഭിനയിച്ച പ്രണയഗാനമാണ് നാളെ വൈകിട്ട് ആറ് മണിക്ക് റിലീസ് ചെയ്യുക. മദന്‍ കര്‍ക്കി വരികള്‍ രചിച്ച ഈ ചിത്രത്തിന് സംഗീതം പകര്‍ന്നിരിക്കുന്നത് ഗോവിന്ദ് വസന്ത ആണ്. പ്രേക്ഷകര്‍ക്കുള്ള ദുല്‍ഖര്‍ സല്‍മാന്റെ വാലെന്റൈന്‍സ് ഡേ സമ്മാനം കുറച്ചു നേരത്തെ എത്തുന്നു എന്നതാണ് ഈ ഗാനം കാത്തിരിക്കുന്ന ആരാധകര്‍ പറയുന്നത്. ചിത്രത്തിലെ മറ്റു രണ്ടു ഗാനങ്ങള്‍ കഴിഞ്ഞ ആഴ്ചകളില്‍ റിലീസ് ചെയ്യുകയും മികച്ച പ്രേക്ഷക പ്രതികരണം നേടുകയും ചെയ്തിരുന്നു. അതിലൊന്ന് ദുല്‍ഖര്‍ സല്‍മാന്‍ തന്നെയാലപിച്ച ഗാനവുമായിരുന്നു.
പ്രശസ്ത നൃത്ത സംവിധായിക ആയ ബ്രിന്ദ മാസ്റ്റര്‍ ആദ്യമായി സംവിധാനം ചെയ്ത ഈ റൊമാന്റിക് കോമഡി ചിത്രം രചിച്ചിരിക്കുന്നത് മദന്‍ കര്‍ക്കി ആണ്. അദിതി റാവുവിനെ കൂടാതെ കാജല്‍ അഗര്‍വാളും നായികാ വേഷം ചെയ്യുന്ന ഈ ചിത്രം ജിയോ സ്റ്റുഡിയോയും ഗ്ലോബല്‍ വണ്‍ സ്റ്റുഡിയോയും ചേര്‍ന്നാണ് നിര്‍മ്മിച്ചിരിക്കുന്നത്. മാര്‍ച്ച് മൂന്നിനാണ് ഹേ സിനാമിക റിലീസ് ചെയ്യുന്നത്.
നക്ഷത്ര നാഗേഷ്, മിര്‍ച്ചി വിജയ്, താപ്പ, കൗശിക്, അഭിഷേക് കുമാര്‍, പ്രദീപ് വിജയന്‍ കോതണ്ഡ രാമന്‍, ഫ്രാങ്ക്, സൗന്ദര്യാ, ജെയിന്‍ തോംപ്‌സണ്‍, നഞ്ഞുണ്ടാന്‍, രഘു, സംഗീത, ധനഞ്ജയന്‍, യോഗി ബാബു എന്നിവരാണ് ചിത്രത്തിലെ മറ്റ് കഥാപാത്രങ്ങളെ അവതരിപ്പിച്ചിരിക്കുന്നത്. ദുല്‍ഖര്‍ സല്‍മാന്റെ സ്വന്തം ബാനര്‍ ആയ വേഫേറര്‍ ഫിലിംസ് ആണ് ഈ ചിത്രം കേരളത്തില്‍ പ്രദര്‍ശനത്തിനെത്തിക്കുന്നത്.
