ദീപാവലി ദിനത്തിൽ മക്കൾക്കൊപ്പവും കൊച്ചുമക്കൾക്കൊപ്പവും പിറന്നാൾ ആഘോഷിച്ച് മലയാളത്തിന്റെ പ്രിയനടി മല്ലിക സുകുമാരൻ. സാമൂഹ്യ മാധ്യമങ്ങളിൽ ഹൃദ്യമായ സന്ദേശങ്ങളാണ് പിറന്നാൾ ആഘോഷിക്കുന്ന അമ്മയ്ക്കായി പങ്കുവെച്ചത്. ‘ഹാപ്പി ബെർത്ത്ഡേ അമ്മ’ എന്ന് മക്കളായ പൃഥ്വിരാജ് സുകുമാരനും ഇന്ദ്രജിത്ത് സുകുമാരനും കുറിച്ചു. എന്നാൽ, മരുമക്കളായ പൂർണിമയും സുപ്രിയയും ‘ഞങ്ങളുടെ പ്രിയപ്പെട്ട അമ്മക്കുട്ടിക്ക് പിറന്നാൾ ആശംസകൾ’ എന്നാണ് കുറിച്ചത്. ഇക്കുറി മകൻ ഇന്ദ്രജിത്തിന്റെ ഒപ്പമായിരുന്നു മല്ലികയുടെ പിറന്നാൾ ആഘോഷം. ആശംസകൾ അറിയിക്കാൻ അമ്മയ്ക്കരികിലേക്ക് പൃഥ്വിരാജും സുപ്രിയയും എത്തിയിരുന്നു.
പച്ച പട്ടുസാരി വെള്ള മുത്തുമാലയും ആയിരുന്നു പിറന്നാൾ ദിനത്തിൽ മല്ലികയുടെ വേഷം. പട്ടുസാരി ചുറ്റി മക്കളുടെ കുടുംബത്തിന് ഒപ്പം നിൽക്കുന്ന ഫോട്ടോ പുറത്തു വന്നതിനു പിന്നാലെ പൂർണിമയ്ക്കും കൊച്ചുമക്കളായ പ്രാർത്ഥനയ്ക്കും നക്ഷത്രയ്ക്കും ഒപ്പം റീൽസിലും മല്ലിക സുകുമാരൻ പ്രത്യക്ഷപ്പെട്ടു. കൊച്ചുമക്കളിൽ മൂത്തയാളായ പ്രാർത്ഥനയാണ് റീൽസ് വീഡിയോ പോസ്റ്റ് ചെയ്തത്. ഏതായാലും മക്കളും മരുമക്കളും കൊച്ചുമക്കളും ചേർന്ന് മല്ലിക സുകുമാരന്റെ പിറന്നാൾ ആഘോഷമാക്കി മാറ്റി.
സിനിമയിൽ ഇപ്പോഴും സജീവമാണ് മല്ലിക സുകുമാരൻ. അവസാനമായി പൃഥ്വിരാജ് സംവിധാനം ചെയ്ത ബ്രോ ഡാഡി എന്ന ചിത്രത്തിലാണ് മല്ലിക സുകുമാരൻ അഭിനയിച്ചത്. 1974ൽ പുറത്തിറങ്ങിയ ഉത്തരായനം എന്ന അരവിന്ദൻ ചിത്രത്തിൽ വേഷമിട്ടാണ് മല്ലികയുടെ അഭിനയ ജീവിതത്തിന് തുടക്കമായത്. സുകുമാരനുമായുള്ള വിവാഹശേഷം അഭിനയരംഗം വിട്ട മല്ലിക സുകുമാരന്റെ മരണശേഷം വീണ്ടും അഭിനയത്തിൽ സജീവമാകുകയായിരുന്നു.
View this post on Instagram
View this post on Instagram
View this post on Instagram
