ജീത്തു ജോസഫിന്റെ പുതിയ ചിത്രമായ ട്വൽത് മാൻ മികച്ച അഭിപ്രായം നേടി സ്ട്രീമിംഗ് തുടരുകയാണ്. ഒടിടി പ്ലാറ്റ്ഫോമായ ഡിസ്നി പ്ലസ് ഹോട്ട് സ്റ്റാറിലാണ് ചിത്രം റിലീസ് ചെയ്തത്. മോഹൻലാലിന് ഒപ്പം മലയാളത്തിലെ യുവതാരങ്ങളും അണിനിരന്ന ചിത്രം പ്രേക്ഷകരുടെ മികച്ച അഭിപ്രായം സ്വന്തമാക്കി. ചിത്രത്തിന്റെ കോ – ഡയറക്ടറായ സുധീഷ് രാമചന്ദ്രൻ ആദ്യമായി ഒരു സിനിമ സംവിധാനം ചെയ്യാൻ പോകുകയാണ്. ‘ഇനി ഉത്തരം’ എന്ന് പേരിട്ടിരിക്കുന്ന സിനിമയുടെ ചിത്രീകരണം പുരോഗമിക്കുകയാണ്. ഏതായാലും ആശാന്റെ ചിത്രത്തിന്റെ വിജയം ‘ഇനി ഉത്തരം’ സിനിമയുടെ സെറ്റിൽ ആഘോഷിച്ചിരിക്കുകയാണ് സുധീഷും സംഘവും. കേക്ക് മുറിച്ചാണ് 12ത് മാൻ സിനിമയുടെ വിജയം ‘ഇനി ഉത്തരം’ സെറ്റിൽ ആഘോഷിച്ചത്.
ജീത്തു ജോസഫിന്റെ ദൃശ്യം സിനിമയിലെ സഹദേവനെ അവതരിപ്പിച്ച കലാഭവൻ ഷാജോണും 12ത് മാൻ സിനിമയിലെ ജിതേഷിനെ അവതരിപ്പിച്ച ചന്തുനാഥും ‘ഇനി ഉത്തരം’ സിനിമയിലെ അഭിനേതാക്കളാണ്. കൂടാതെ ഹരീഷ് ഉത്തമൻ, അപർണ ബാലമുരളി, ജാഫർ ഇടുക്കി എന്നിവരും അഭിനേതാക്കളാണ്. ഇവരും സിനിമയുടെ മറ്റ് അണിയറപ്രവർത്തകരും ഒരുമിച്ച് ആയിരുന്നു ട്വൽത് മാൻ വിജയം ആഘോഷിച്ചത്.
ദിലീപിനെ നായകനാക്കി ജീത്തു ജോസഫ് ഒരുക്കിയ ലൈഫ് ഓഫ് ജോസൂട്ടി സിനിമയുടെ ക്യാമറമാനായ രവിചന്ദ്രൻ ആണ് ഈ ചിത്രത്തിന്റെയും ഛായാഗ്രഹണം. പാലക്കാട് ധോണിയിൽ ആണ് സിനിമ ചിത്രീകരിക്കുന്നത്. അപർണ ബാലമുരളി, ഹരീഷ് ഉത്തമൻ, കലാഭവൻ ഷാജോൺ, സിദ്ദിഖ്, ജാഫർ ഇടുക്കി, ചന്തുനാഥ്, സിദ്ധാർത്ഥ് മേനോൻ എന്നിവരാണ് പ്രധാന കഥാപാത്രങ്ങളെ അവതരിപ്പിക്കുന്നത്. എ ആന്റ് വി എന്റർടയിൻമെന്റിന്റെ ബാനറിൽ വരുൺ, അരുൺ എന്നിവർ ചേർന്നാണ് ചിത്രം നിർമിക്കുന്നത്. സഹോദരങ്ങളായ രഞ്ജിത്ത്, സനീഷ് എന്നിവർ ചേർന്നാണ് ചിത്രത്തിന്റെ രചന. എഡിറ്റിംഗ് – ജിതിൻ ഡി കെ, സംഗീതം – ഹിഷാം അബ്ദുൾ വഹാബ്, ഗാനരചന – വിനായക് ശശികുമാർ, മേക്കപ്പ് – ജിതേഷ് പൊയ്യ, ആർട്ട് – അരുൺ മോഹനൻ, വസ്ത്രാലങ്കാരം – ധന്യ ബാലകൃഷ്ണൻ.
