വലിയ ബഹളങ്ങളില്ലാതെ തിയറ്ററുകളിലേക്ക് എത്തി പിന്നെ വമ്പൻ ഹിറ്റ് ആയി മാറിയ ചിത്രമാണ് ജാൻ എ മൻ. ചിദംബരം ആദ്യമായി സംവിധാനം ചെയ്ത ഈ ചിത്രത്തെ സർപ്രൈസ് ഹിറ്റ് എന്ന് വിശേഷിപ്പിച്ചാലും മതിയാകില്ല. കഴിഞ്ഞ വർഷം നവംബർ 19ന് ആയിരുന്നു ജാൻ എ മൻ തിയറ്ററുകളിൽ എത്തിയത്. എന്നാൽ, അതേസമയം തിയറ്ററുകളിൽ എത്തിയ വമ്പൻ റിലീസുകളെ അതിജീവിച്ച് മികച്ച പ്രകടനമാണ് ജാൻ എ മൻ നടത്തിയത്. ചിയേഴ്സ് എന്റര്‍ടെയിൻമെന്റ്സിന്റെ ബാനറിൽ ആണ് ചിത്രം പുറത്ത് വന്നത്.
കഴിഞ്ഞദിവസം ചിത്രത്തിന്റെ വിജയാഘോഷം കൊച്ചി ക്രൗൺ പ്ലാസയിൽ വച്ചു നടന്നു. താരങ്ങളും അണിയറ പ്രവർത്തകരും ആഘോഷത്തിൽ പങ്കെടുക്കാൻ എത്തിയിരുന്നു.
ചിത്രത്തിന്റ വിജയാഘോഷ വേദിയിൽ വെച്ചു ‘ജാൻ – എ – മൻ ‘ നിർമ്മാതാക്കളായ ചിയേർസ് എന്റർടൈൻമെന്റ്സിന്റെ പുതിയ സിനിമയുടെ ലോഞ്ചും നടന്നു.
ലക്ഷ്മി വാര്യർ, ഗണേഷ് മേനോൻ എന്നിവരാണ് ചിയേഴ്സ് എന്റർടൈൻമെന്റിന്റെ സാരഥികൾ. ദർശന രാജേന്ദ്രൻ, ബേസിൽ ജോസഫ് എന്നിവർ പ്രധാന കഥാപാത്രങ്ങളാകുന്ന പുതിയ ചിത്രത്തിന്റെ പേര് ‘ജയ ജയ ജയ ജയ ഹേ ‘ എന്നാണ്. വമ്പൻ ഹിറ്റായ ഹൃദയത്തിന് ശേഷം ദർശന അഭിനയിക്കുന്ന ചിത്രമാണിത്. അന്താക്ഷരി എന്ന സിനിമ ഒരുക്കിയ വിപിൻ ദാസ് ആണ് സംവിധായകൻ. മെയ്‌ പകുതിയോടെ കൊല്ലത്തു ചിത്രത്തിന്റെ ഷൂട്ടിംഗ് ആരംഭിക്കും.
വാർത്താപ്രചരണം – വൈശാഖ് സി വടക്കേവീട്, ജിനു അനിൽകുമാർ.
