സിനിമാപ്രേമികൾ ആകാംക്ഷയോടെ കാത്തിരിക്കുന്ന ചിത്രമാണ് ജയറാം നായകനായി എത്തുന്ന അബ്രഹാം ഓസ് ലർ. ചിത്രത്തിന്റെ ട്രയിലർ കഴിഞ്ഞദിവസം റിലീസ് ചെയ്തിരുന്നു. മിഥുൻ മാനുവൽ തോമസ് സംവിധാനം ചെയ്യുന്ന ചിത്രത്തിൽ വമ്പൻ താരനിരയാണ് അണി നിരക്കുന്നത്. നടൻ മമ്മൂട്ടിയും ചിത്രത്തിൽ ഒരു പ്രധാന വേഷത്തിൽ എത്തുന്നുണ്ടെന്നാണ് റിപ്പോർട്ടുകൾ. എന്നാൽ ഇതു സംബന്ധിച്ച് സ്ഥിരീകരണങ്ങൾ ഒന്നും വന്നിട്ടില്ല.
കഴിഞ്ഞദിവസം ജയറാമിനോട് ഓസ് ലെറിൽ മമ്മൂട്ടി എത്തുന്നുണ്ടോ എന്ന് ചോദിച്ചെങ്കിലും തനിക്ക് ഇതിനെക്കുറിച്ച് ധാരണയില്ലെന്ന മറുപടിയാണ് അദ്ദേഹം നൽകിയത്. ഇത് സംബന്ധിച്ച് ചോദ്യം ഉന്നയിച്ച മാധ്യമപ്രവർത്തകരോട് ഓസ് ലറിന്റെ സെറ്റിൽ താൻ 54 ദിവസം ഉണ്ടായിരുന്നെന്നും അന്നൊന്നും മമ്മൂക്കയെ കണ്ടിട്ടില്ലെന്നുമുള്ള മറുപടിയാണ് ജയറാം ചോദ്യങ്ങൾക്ക് മറുപടിയായി നൽകിയത്. ഇനി താനില്ലാത്തെ ദിവസം മമ്മൂട്ടി എത്തിയോ എന്നറിയില്ലെന്നും ജയറാം പറഞ്ഞു.
അതേസമയം, കഴിഞ്ഞദിവസം റിലീസ് ചെയ്ത ഓസ് ലറിന്റെ ട്രയിലറിൽ ശബ്ദം കൊണ്ട് മമ്മൂട്ടി സാന്നിധ്യം അറിയിച്ചിരുന്നു. ട്രയിലറിന്റെ അവസാനഭാഗത്ത് ആയിരുന്നു മമ്മൂട്ടിയുടെ ശബ്ദം എത്തിയത്. ‘ഒരു ഡെവിൾസ് ആൾട്ടർനേറ്റീവ്’ എന്ന ഡയലോഗ് പറയുന്നത് മമ്മൂട്ടിയാണ്. ട്രയിലർ ഇറങ്ങി മിനിറ്റുകൾക്കുള്ളിൽ തന്നെ ഇത് ആരാധകർ കണ്ടെത്തുകയും ചെയ്തിരുന്നു. ജനുവരി 11ന് ചിത്രം തിയറ്ററിൽ എത്തും. ദിലീഷ് പോത്തൻ, അ‍ർജുൻ അശോകൻ, അനശ്വര രാജൻ, ജഗദീഷ്, സായ് കുമാർ തുടങ്ങി ഒരു വലിയ താരനിര തന്നെയുണ്ട് ചിത്രത്തിൽ. ഇര്‍ഷാദ് എം ഹസനും മിഥുന്‍ മാനുവല്‍ തോമസും ചേര്‍ന്ന് നിര്‍മ്മിക്കുന്ന ചിത്രത്തിന്റെ ഛായാഗ്രഹണം നന്‍പകല്‍ നേരത്ത് മയക്കമുള്‍പ്പെടെയുള്ള ചിത്രങ്ങളുടെ ക്യാമറ കൈകാര്യം ചെയ്ത തേനി ഈശ്വര്‍ ആണ്. സംഗീതം മിഥുന്‍ മുകുന്ദന്‍, എഡിറ്റിംഗ് ഷമീര്‍ മുഹമ്മദ്, പ്രൊഡക്ഷന്‍ ഡിസൈന്‍ ഗോകുല്‍ ദാസ്.
