നടൻ ജയറാമിനെ നായകനാക്കി മിഥുൻ മാനുവൽ തോമസ് സംവിധാനം ചെയ്യുന്ന ചിത്രം ഒസ് ലർ റിലീസ് പ്രഖ്യാപിച്ചു. ചിത്രം ക്രിസ്മസിന് റിലീസ് ആകില്ല. 2024 ജനുവരി 11ന് ചിത്രം തിയറ്ററുകളിൽ എത്തും. നേരത്തെ ക്രിസ്മസ് റിലീസ് ആയി ചിത്രം എത്തുമെന്നാണ് അണിയറപ്രവർത്തകർ അറിയിച്ചത്. എന്നാൽ, പുതുവർഷത്തിൽ മാത്രമേ ചിത്രം റിലീസ് ആകുകയുള്ളൂ എന്ന് അറിയിച്ചിരിക്കുകയാണ് ഇപ്പോൾ.
വൻ ഹിറ്റ് ആയിരുന്ന അഞ്ചാം പാതിരയ്ക്ക് ശേഷം മിഥുൻ മാനുവൽ തോമസ് സംവിധാനം ചെയ്യുന്ന ചിത്രമാണ് ഒസ് ലർ. ജയറാമാണ് നായകനെന്നതും ചിത്രത്തിന്റെ പ്രതീക്ഷ വർദ്ധിപ്പിക്കുന്നു. അഞ്ചാം പാതിരയ്ക്ക് ശേഷം ഗരുഡൻ, ഫീനിക്സ് എന്നീ സിനിമകളുടെ രചന മിഥുൻ മാനുവൽ തോമസ് നിർവഹിച്ചിരുന്നു. അതേസമയം, എബ്രഹാം ഒസ് ലർ എന്ന സിനിമയുടെ രചന നിർവഹിച്ചിരിക്കുന്നത് ഡോ, രൺധീർ കൃഷ്ണൻ ആണ്.
ചിത്രത്തിലെ ജയറാമിന്‍റെ ലുക്ക് നേരത്തേ തന്നെ ശ്രദ്ധിക്കപ്പെട്ടിരുന്നു. ഒസ് ലറിൽ 15 മിനിറ്റോളം ദൈര്‍ഘ്യമുള്ള ഒരു അതിഥിവേഷത്തില്‍ മമ്മൂട്ടി എത്തുന്നുണ്ടെന്ന് റിപ്പോർട്ടുകൾ ഉണ്ടായിരുന്നു. എന്നാൽ, ഇത് സംബന്ധിച്ച് ഔദ്യോഗിക വിശദീകരണം ഒന്നും തന്നെ വന്നിട്ടില്ല. ഇര്‍ഷാദ് എം ഹസനും മിഥുന്‍ മാനുവല്‍ തോമസും ചേര്‍ന്ന് നിര്‍മ്മിക്കുന്ന ചിത്രത്തിന്റെ ഛായാഗ്രഹണം നന്‍പകല്‍ നേരത്ത് മയക്കമുള്‍പ്പെടെയുള്ള ചിത്രങ്ങളുടെ ക്യാമറ കൈകാര്യം ചെയ്ത തേനി ഈശ്വര്‍ ആണ്. സംഗീതം മിഥുന്‍ മുകുന്ദന്‍, എഡിറ്റിംഗ് ഷമീര്‍ മുഹമ്മദ്, പ്രൊഡക്ഷന്‍ ഡിസൈന്‍ ഗോകുല്‍ ദാസ്. മോഹൻലാൽ ചിത്രമായ മാലൈക്കോട്ടെ വാലിബൻ ജനുവരി 25ന് ആയിരിക്കും തിയറ്ററുകളിൽ എത്തുക.
