ഒരിടവേളയ്ക്ക് ശേഷം ജയറാം-സത്യന്‍ അന്തിക്കാട് കൂട്ടുകെട്ടില്‍ ഒരുങ്ങുന്ന ചിത്രമാണ് മകള്‍. മീരാ ജാസ്മിനാണ് ചിത്രത്തില്‍ നായിക. പതിവ് പോലെ വൈകിയാണ് ചിത്രത്തിനും സത്യന്‍ അന്തിക്കാട് പേര് കണ്ടെത്തിയത്. ചിത്രത്തിന് ‘മകള്‍’ എന്ന പേര് വന്നതിനെ കുറിച്ച് ജയറാം പറയുന്നതാണ് ശ്രദ്ധേയമായിരിക്കുന്നത്. പ്രഭാസ് നായകനാകുന്ന ‘രാധേ ശ്യാം’ എന്ന സിനിമയുടെ പ്രമോഷനിടെയാണ് ജയറാം ഇക്കാര്യം പറഞ്ഞത്.
ചിത്രത്തിന്റെ അവസാന ദിവസം പേരിടുന്നതുമായി ബന്ധപ്പെട്ട് സത്യന്‍ അന്തിക്കാടുമായി സംസാരിച്ചിരുന്നുവെന്ന് ജയറാം പറയുന്നു. അന്നും പേര് ഒന്നുമായിരുന്നില്ല. ഇതിനിടെയാണ് ഷൂട്ടിംഗ് കാണുന്നതിനായി തന്റെ മകള്‍ മാളവിക അവിടേയ്ക്ക് വരുന്നത്. കുറേ കുടുംബങ്ങളും ഷൂട്ടിംഗ് കാണാന്‍ എത്തിയിരുന്നു. അവരില്‍ ചിലര്‍ ആരാ കൂടെ എന്ന് ചോദിച്ചു. മകളാണെന്ന് താന്‍ മറുപടി പറഞ്ഞു. സത്യന്‍ അന്തിക്കാട് അത് കേട്ടു. എന്നിട്ട് തന്റെ അടുത്തു വന്ന് നമ്മുടെ സിനിമയുടെ പേര് ‘മകള്‍’ എന്നാണെന്ന് പറഞ്ഞു. ഒരച്ഛന്‍ തന്റെ മകളെ ആളുകളുടെ മുന്നില്‍ അഭിമാനത്തോടെ പരിചയപ്പെടുത്തുന്നതുകണ്ടാണ് അദ്ദേഹം ആ പേരിട്ടത്. അങ്ങനെയാണ് ‘മകള്‍’ ഉണ്ടായതെന്നും ജയറാം പറഞ്ഞു.
പതിനൊന്ന് വര്‍ഷത്തിന് ശേഷമാണ് ജയറാമും സത്യന്‍ അന്തിക്കാടും ഒരു ചിത്രത്തില്‍ ഒന്നിക്കുന്നത്. 2010 ല്‍ പുറത്തിറങ്ങിയ കഥ തുടരുന്നു എന്ന ചിത്രത്തിലാണ് ഇരുവരും അവസാനം ഒന്നിച്ചത്.
