പ്രശസ്ത സിനിമാ താരം ഗായത്രി സുരേഷ് ഉൾപ്പെട്ട ഒരു വാഹനാപകടവും തുടർന്ന് ഉണ്ടായ നാട്ടുകാരുടെ പ്രതിഷേധവും രണ്ടു ദിവസമായി സോഷ്യൽ മീഡിയയിൽ ചർച്ചയാണ്. അതിനു ശേഷം ഇൻസ്റ്റാഗ്രാം വീഡിയോ വഴിയും അല്ലാതെയും ഗായത്രി സുരേഷ് നൽകിയ വിശദീകരണങ്ങളും വലിയ രീതിയിൽ തന്നെ ശ്രദ്ധ നേടുകയാണ്. എന്നാൽ ചില യൂട്യൂബ് ചാനലുകൾ തെറ്റായ വാർത്തകളും പുറത്തു വിടുന്നുണ്ടായിരുന്നു. അതിലൊന്നായിരുന്നു, അപകട സമയത്തു ഗായത്രിക്കൊപ്പം ഉണ്ടായിരുന്ന സുഹൃത് നടൻ ജിഷിൻ മോഹൻ ആയിരുന്നു എന്ന വാർത്ത. ഇപ്പോഴിതാ അത് നിഷേധിച്ചു കൊണ്ട് രംഗത്തു വന്നിരിക്കുകയാണ് ജിഷിൻ.
ചിലത് പ്രചരിപ്പിച്ച വാർത്തകളിൽ പറയുന്ന ആ ജിഷിന്‍ താനല്ല എന്നു ഈ നടൻ വെളിപ്പെടുത്തുന്നു. ഗായത്രി സുരേഷിനൊപ്പം ഉണ്ടായിരുന്ന സീരിയല്‍ നടന്‍ ഇവനാണ് എന്ന തലക്കെട്ടോടെ ചില വാര്‍ത്തകള്‍ കണ്ടു എന്നും ഇതിനെതിരെ ശരിക്കും മാനനഷ്ടത്തിന് കേസ് നല്‍കുകയാണ് വേണ്ടത് എന്നും ജിഷിൻ പറയുന്നു. പക്ഷെ അതിനുളള സമയമില്ലാത്തത് കൊണ്ടാണ് അത് ചെയ്യാത്തത് എന്നു ജിഷിൻ വ്യക്തമാക്കി. വാര്‍ത്തകള്‍ വളച്ചൊടിച്ച് നല്‍കുമ്പോള്‍ തനിക്കും അച്ഛനും അമ്മയും ഉണ്ടെന്നു ഓര്‍ക്കണമെന്നും തെറ്റു ചെയ്യാത്ത ആളുകളെ അനാവശ്യ വിവാദങ്ങളിലേക്ക് വലിച്ചിഴക്കരുത് എന്നും ജിഷിൻ കൂട്ടിച്ചേർത്തു.
രണ്ടു ദിവസം മുൻപ് കാക്കനാട് അടുത്തു വെച്ചാണ് നടി ഗായത്രി സുരേഷും സുഹൃത്തും സഞ്ചരിച്ച കാർ, ഓവർ ടേക്ക് ശ്രമത്തിനിടെ എതിരെ വന്ന വാഹനത്തിന്റെ സൈഡ് മിറർ തകർത്തു കുതിച്ചത്. അപകടത്തിന് ശേഷം നിർത്താതെ പോയ നടിയുടെ വണ്ടിയെ അവർ പിന്തുടർന്ന് പിടിച്ചു തടഞ്ഞു വെച്ചു പ്രതിഷേധിക്കുകയായിരുന്നു. അവസാനം പോലീസ് വന്നാണ് പ്രശ്നം പരിഹരിച്ചത്. താനൊരു സെലിബ്രിറ്റി ആയതിനാൽ ആളുകൾ എങ്ങനെ പ്രതികരിക്കും എന്ന ടെൻഷൻ കൊണ്ടാണ് നിർത്താതെ പോയതെന്ന് ഗായത്രി പറയുന്നു. ഏതായാലും സംഭവത്തിന്റെ വീഡിയോ വലിയ രീതിയിൽ ആണ് സോഷ്യൽ മീഡിയയിൽ പ്രചരിച്ചത്.
