തിയറ്ററിൽ വമ്പൻ തരംഗം തീർത്ത ചിത്രമായിരുന്നു പൃഥ്വിരാജിനെ നായകനാക്കി ഷാജി കൈലാസ് സംവിധാനം ചെയ്ത കടുവ. നീണ്ട ഇടവേളയ്ക്ക് ശേഷം പൃഥ്വിരാജും ഷാജി കൈലാസും ഒരുമിച്ച് എത്തിയ ‘കടുവ’ ഒരു മാസ് ആക്ഷൻ എന്റർടയിനർ ആയിരുന്നു. തിയറ്ററിൽ മികച്ച വിജയം സ്വന്തമാക്കിയ കടുവ താമസിയാതെ ഒടിടി പ്ലാറ്റ്ഫോമിൽ സ്ട്രീമിംഗ് ആരംഭിക്കും. ഏതായാലും സിനിമയുടെ വിജയാഘോഷങ്ങൾക്ക് പിന്നാലെ പുതിയ വാഹനം സ്വന്തമാക്കിയിരിക്കുകയാണ് ചിത്രത്തിന്റെ തിരക്കഥാകൃത്ത് ആയ ജിനു എബ്രഹാം.
വോൾവോയുടെ എക്സ് സി 60 ആണ് ജിനു സ്വന്തമാക്കിയത്. 66 ലക്ഷം രൂപയാണ് ഈ വാഹനത്തിന്റെ എക്സ് ഷോറൂം വില. കടുവ റിലീസ് ചെയ്ത് ദിവസങ്ങൾക്കുള്ളിൽ ചിത്രത്തിന്റെ സംവിധായകനായ ഷാജി കൈലാസ് ഇതേ വാഹനം സ്വന്തമാക്കിയിരുന്നു. ഇതിനു പിന്നാലെയാണ് തിരക്കഥാകൃത്തും ഈ വാഹനം സ്വന്തമാക്കിയത്. കടുവ ഇതിനകം തന്നെ 50 കോടി ക്ലബിൽ ഇടം പിടിച്ചു കഴിഞ്ഞു. പൃഥ്വിരാജ് നായകനായി എത്തിയ ആദം ജോൺ എന്ന ചിത്രത്തിന്റെ സംവിധായകനായ ജിനു ലണ്ടൻ ബ്രിഡ്ജ്, മാസ്റ്റേഴ്സ്, അന്വേഷിപ്പിൻ കണ്ടെത്തും എന്നീ ചിത്രങ്ങളുടെ തിരക്കഥാകൃത്ത് കൂടിയാണ്.
ഓഗസ്റ്റ് നാലിന് കടുവ ഒ ടി ടി പ്ലാറ്റ്ഫോമിൽ റിലീസ് ചെയ്യും. ആമസോൺ പ്രൈമിലാണ് കടുവ എത്തുന്നത്. തിയറ്ററുകളില്‍ കടുവയ്ക്ക് മികച്ച പ്രതികരണമായിരുന്നു ലഭിച്ചത്. ഷാജി കൈലാസ് എന്ന സംവിധായകന്റെ ഗംഭീര തിരിച്ചുവരവാണ് ചിത്രമെന്നാണ് പ്രേക്ഷകര്‍ ഒന്നടങ്കം പറഞ്ഞത്. പൃഥ്വിരാജിന്റെ കട്ട മാസ് പ്രകടനവും സിനിമാസ്വാദകരെ ത്രസിപ്പിച്ചു. അതിനിടെ കടുവ വിവാദത്തിലും ഉൾപ്പെട്ടു. പൃഥ്വിരാജിന്റെ ഒരു ഡയലോഗ് ആണ് വിവാദമായത്. തുടര്‍ന്ന് മാപ്പ് പറഞ്ഞ കടുവ ടീം ആ ഡയലോഗ് സിനിമയില്‍ നിന്ന് നീക്കുകയും ചെയ്തു. പൃഥ്വിരാജ് പ്രൊഡക്ഷന്‍സും ലിസ്റ്റിന്‍ സ്റ്റീഫന്റെ മാജിക് ഫ്രെയിംസും ചേര്‍ന്നാണ് ചിത്രം നിര്‍മിച്ചത്.
