ത്രസിപ്പിക്കുന്ന ആക്ഷൻ രംഗങ്ങളുമായി കടുവ ടീസർ എത്തി

ത്രസിപ്പിക്കുന്ന ആക്ഷൻ രംഗങ്ങളുമായി കടുവ ടീസർ എത്തി. മലയാളത്തിന്റെ യുവനടൻ പൃഥ്വിരാജിനെ നായകനാക്കി ഷാജി കൈലാസ് സംവിധാനം ചെയ്യുന്ന ചിത്രമാണ് കടുവ. ടീസർ റിലീസ് ചെയ്ത് മൂന്ന് മണിക്കൂറിനുള്ളിൽ നാലു ലക്ഷത്തിനടുത്ത് ആളുകളാണ് കണ്ടത്. ‘തിരിച്ചു കിട്ടി ഞങ്ങൾക്ക് ആ പഴയ രാജുവേട്ടനെ. ഇതാണ് കൊറേ നാളായിട്ട് ഞാൻ ആഗ്രഹിച്ചത്, ദൈവം ഉണ്ട്’ എന്നാണ് ഒരാൾ കമന്റ് ബോക്സിൽ കുറിച്ചത്.

ബോളിവുഡ് താരം വിവേക് ഒബ്റോയി ആണ് കടുവയിൽ വില്ലൻ വേഷത്തിൽ എത്തുന്നത്. പൃഥ്വിരാജ് സംവിധാനം ചെയ്ത ലൂസിഫർ എന്ന സിനിമയിൽ വിവേക് ഒബ്റോയി ബോബി എന്ന വില്ലൻ വേഷത്തിൽ എത്തിയിരുന്നു. ലൂസിഫറിന് ശേഷം ഇരുവരും ഒരുമിച്ചെത്തുന്ന ചിത്രം കൂടിയാണ് കടുവ.

പൃഥ്വിരാജ് പ്രൊഡക്ഷന്‍സിന്റെ ബാനറിൽ സുപ്രിയ മേനോനും ലിസ്റ്റിന്‍ സ്റ്റീഫന്റെ ഉടമസ്ഥതയിലുള്ള മാജിക് ഫ്രെയിംസും ചേര്‍ന്നാണ് കടുവയുടെ നിർമാണം. എട്ട് വര്‍ഷങ്ങള്‍ക്ക് ശേഷം ഷാജി കൈലാസ് മലയാള സിനിമയിലേക്ക് മടങ്ങിയെത്തുന്നു എന്ന പ്രത്യേകതയുമുണ്ട് കടുവ എന്ന ചിത്രത്തിന്. 2013-ല്‍ പ്രേക്ഷകരിലേക്കെത്തിയ ജിഞ്ചര്‍ ആണ് ഷാജി കൈലാസ് ഏറ്റവും അവസാനമായി സംവിധാനം ചെയ്ത മലയാള ചിത്രം. ജിനു വി എബ്രഹാം ആണ് ചിത്രത്തിന് തിരക്കഥ ഒരുക്കിയിരിക്കുന്നത്. പൃഥ്വിരാജിനെ നായകനാക്കി ഷാജി കൈലാസ് ഒരുക്കുന്ന രണ്ടാമത്തെ ചിത്രംകൂടിയാണ് കടുവ. 2012-ല്‍ സിംഹാസനം എന്ന ചിത്രം ഷാജി കൈലാസ്- പൃഥ്വിരാജ് കൂട്ടുകെട്ടില്‍ ഒരുങ്ങിയിരുന്നു.