ടോവിനോ തോമസ്, കല്യാണി പ്രിയദർശൻ എന്നിവർ പ്രധാനവേഷങ്ങളിൽ എത്തുന്ന ചിത്രമാണ് തല്ലുമാല. അനുരാഗക്കരിക്കിൻ വെള്ളം, ഉണ്ട, ലൗ എന്നീ ചിത്രങ്ങൾക്ക് ശേഷം ഖാലിദ് റഹ്മാൻ ഒരുക്കുന്ന ചിത്രമാണ് തല്ലുമാല. ആഷിക്ക് ഉസ്മാൻ പ്രൊഡക്ഷൻസിന്റെ ബാനറിൽ ആഷിക്ക് ഉസ്മാൻ നിർമിക്കുന്ന ചിത്രം ടൊവിനോയുടെ കരിയറിലെ ഏറ്റവും ബജറ്റ് കൂടിയ സിനിമകളിൽ ഒന്നാണ്. മണവാളൻ വസീം എന്ന കഥാപാത്രമായാണ് ചിത്രത്തിൽ ടോവിനോ എത്തുന്നത്.
കല്യാണി പ്രിയദർശൻ നായികയാവുന്ന സിനിമയിൽ ഷൈൻ ടോം ചാക്കോയും പ്രധാന വേഷത്തിൽ എത്തുന്നുണ്ട്. ഇപ്പോഴിതാ കല്യാണിയുടെ ചിത്രത്തിലെ ക്യാരക്ടർ പോസ്റ്റർ ഇപ്പോൾ പുറത്തിറങ്ങിയിരിക്കുകയാണ്. ടൊവിനോ തോമസിന്റെ നായികയായി ആദ്യമായി കല്യാണി എത്തുന്ന ചിത്രത്തിൽ ബീപാത്തു എന്ന കഥാപാത്രത്തെയാണ് താരം അവതരിപ്പിക്കുന്നത്. കളർഫുൾ എന്റർടൈനറായി ഒരുക്കുന്ന ചിത്രത്തിന് തിരക്കഥ ഒരുക്കുന്നത് മുഹ്സിൻ പെരാരിയും അഷറഫ് ഹംസയും ചേർന്നാണ്. ക്യാമറ ജിംഷി ഖാലിദ്. ജോണി ആന്റണി, ബിനു പപ്പു, ലുക്ക്മാൻ അവറാൻ തുടങ്ങി ഒരു നീണ്ട താരനിര തന്നെ ചിത്രത്തിലുണ്ട്.
“തല്ലുമാല എന്ന സിനിമ ഒരേസമയം ഏറ്റവും ആവേശകരവും വെല്ലുവിളി നിറഞ്ഞതുമാണ്. അനുരാഗ കരിക്കിൻ വെള്ളം, ഉണ്ട, ലവ് എന്നീ ഖാലിദിന്റെ മുൻ ചിത്രങ്ങളിൽ നിന്ന് വ്യത്യസ്തമായ ഒരു എന്റർടെയ്‌നറാണ് ഈ സിനിമ. മുഹ്സിൻ പെരാരിയുടെ മുൻ സിനിമകളായ വൈറസ്, സുഡാനി ഫ്രം നൈജീരിയ എന്നിവയിൽ നിന്നും ഇത് വ്യത്യസ്തമാണ്. എട്ട് സംഘട്ടന രംഗങ്ങളും എട്ട് ഗാനങ്ങളുമുള്ള സിനിമയാണ് ‘തല്ലുമാല” – ടോവിനോ ചിത്രത്തെക്കുറിച്ച് നിർമാതാവ് പറഞ്ഞ വാക്കുകളാണിത്. തലശ്ശേരി, കോഴിക്കോട്, മലപ്പുറം എന്നിവിടങ്ങളിലാണ് സിനിമയുടെ ചിത്രീകരണം. കോളേജ് കാലഘട്ടം മുതൽ 30 വയസ് വരെ നീണ്ടുനിൽക്കുന്ന ഒരു യുവാവിന്റെ കഥ മലബാർ പശ്ചാത്തലത്തിൽ പറയുകയാണ് സിനിമയിൽ.
