‘ഈ പ്രായത്തിലും മമ്മൂക്കയെ ഇങ്ങനെ കാണാൻ കഴിഞ്ഞപ്പോൾ എനിക്ക് എന്തെന്നില്ലാത്ത സന്തോഷം തോന്നി’ – മമ്മൂട്ടി നായകനായി എത്തിയ കണ്ണൂർ സ്ക്വാഡ് കണ്ടിറങ്ങിയ ഒരു പ്രേക്ഷകൻ സോഷ്യൽ മീഡിയയിൽ കുറിച്ചതാണ് ഇത്. കണ്ണൂർ സ്ക്വാഡ് എന്ന സിനിമയുടെ പ്ലസ് പോയിന്റും ഇതു തന്നെയാണ്. കണ്ടിറങ്ങിയവർ ചിത്രത്തെ വാനോളം പുകഴ്ത്തിയപ്പോൾ ഒറ്റപ്പകൽ കൊണ്ട് സിനിമ പ്രദർശിപ്പിക്കുന്ന കേന്ദ്രങ്ങളുടെ എണ്ണവും സ്ക്രീനുകളുടെ എണ്ണവും വർദ്ധിച്ചു. പുതിയതായി 70 സ്ക്രീനുകളിലാണ് ഇന്നലെ രാത്രി മുതൽ കണ്ണൂർ സ്ക്വാഡ് പ്രദർശിപ്പിച്ച് തുടങ്ങിയത്. തിരക്കഥ തന്നെയാണ് ഈ സിനിമയുടെ നട്ടെല്ല്. റോബി വർഗീസ് രാജ് ആദ്യമായി സംവിധാനം ചെയ്യുന്ന ചിത്രത്തിന് തിരക്കഥ ഒരുക്കിയത് അദ്ദേഹത്തിനഅറെ സഹോദരൻ റോണി രാജും ഷാഫിയും ചേർന്നാണ്. എ എസ് ഐ ജോർജ് മാർട്ടിൻ ആയി മമ്മൂട്ടി എത്തിയപ്പോൾ അദ്ദേഹത്തിന്റെ സ്ക്വാഡ് അംഗങ്ങളായി എത്തിയ ശബരീഷ് വർമയും റോണിയും അസീസ് നെടുമങ്ങാടും ചിത്രത്തെ ഒരു സൂപ്പ‍ർ സ്ക്വാഡ് ആക്കി മാറ്റുകയായിരുന്നു. മമ്മൂട്ടി പൊലീസ് വേഷത്തിൽ എത്തിയ പഴയകാല സിനിമകളിൽ പഞ്ച് ഡയലോഗുകളും മാസ് ബി ജി എമ്മും ഉണ്ടായിരുന്നെങ്കിൽ കണ്ണൂർ സ്ക്വാഡിൽ എത്തുമ്പോൾ സാധാരണക്കാരനായ സൗമ്യനായ ഒരു പൊലീസ് കഥാപാത്രമായാണ് മമ്മൂട്ടി എത്തുന്നത്.
ആദ്യാവസാനം പ്രേക്ഷകരെ ആകാംക്ഷയുടെ മുൾമുനയിൽ നിർത്തുന്ന ഒരു ഗംഭീര ത്രില്ലർ ആണ് കണ്ണൂർ സ്ക്വാഡ്. കേരളത്തിന്റെ ഒരറ്റത്ത് നിന്ന് രാജ്യത്തിന്റെ മറ്റൊരറ്റത്തേക്ക് അന്വേഷണവുമായി ബന്ധപ്പെട്ട് എ എസ് ഐ ജോർജ് മാർട്ടിന് ഒപ്പമുള്ള ക്രൈം സ്ക്വാഡ് എത്തുകയാണ്. കണ്ണൂർ എസ് പിയുടെ കീഴിലുള്ള ക്രൈം സ്ക്വാഡിന്റെ കഥയാണ് സിനിമ പറയുന്നത്. രാഷ്ട്രീയസമ്മർദ്ദം അമിതമാകുന്നത് മൂലം എത്രയും പെട്ടെന്ന് തെളിയിക്കേണ്ടി വരുന്ന ഒരു കേസ്. പ്രതികളെ പിടികൂടാൻ ആകെ ലഭിക്കുന്നത് പത്ത് ദിവസം. റാങ്കുകളുടെ പകിട്ടില്ലാത്ത സാധാരണ പൊലീസുകാരാണ് ക്രൈം സ്ക്വാഡിലെ നാലുപേരും. അതുകൊണ്ടു വിമാനത്തിൽ അന്വേഷണയാത്ര പോകണമെങ്കിൽ നിരവധി നടപടിക്രമങ്ങൾ കടക്കേണ്ടതായിട്ടുണ്ട്. അതുകൊണ്ടു തന്നെ റോഡ് മാർഗം ഒരു സാധാരണവണ്ടി ഓടിച്ച് ഇവർ അന്വേഷണയാത്ര തുടങ്ങുകയാണ്. ചുരുക്കത്തിൽ ഗംഭീരമായ ത്രില്ലറിനൊപ്പം തന്നെ മനോഹരമായ ഒരു റോഡ് മൂവി കൂടിയാണ് കണ്ണൂർ സ്ക്വാഡ്.
മമ്മൂട്ടി കമ്പനിയുടെ നാലാമത് ചിത്രമാണ് കണ്ണൂർ സ്ക്വാഡ്. റോബി വർഗീസ് രാജ് സംവിധാനം ചെയ്യുന്ന ചിത്രത്തിന്റെ കഥ ഷാഫിയുടേതാണ്. ഡോക്ടർ റോണിയും ഷാഫിയും ചേർന്നാണ് തിരക്കഥ രചിച്ചിരിക്കുന്നത്. കുറ്റാന്വേഷണചിത്രമായാണ് കണ്ണൂർ സ്ക്വാഡ് എത്തുന്നത്. നൻപകൽ നേരത്ത് മയക്കം, റോഷാക്ക്, കാതൽ എന്നീ ചിത്രങ്ങൾക്ക് ശേഷം മമ്മൂട്ടി കമ്പനി നിർമിക്കുന്ന ചിത്രമാണ് കണ്ണൂർ സ്ക്വാഡ്. സംവിധായകൻ റോബി രാജിന്റെ ആദ്യചിത്രം കൂടിയാണ് ഇത്. ഗ്രേറ്റ് ഫാദർ, പുതിയ നിയമം എന്നീ ചിത്രങ്ങളുടെ ഛായാഗ്രാഹകൻ ആയിരുന്നു റോബി രാജ്. കിഷോർ കുമാർ, വിജയരാഘവൻ, അസീസ് നെടുമങ്ങാട്, ശബരീഷ്, റോണി ഡേവിഡ്, മനോജ് കെ യു തുടങ്ങിയ താരങ്ങൾ പ്രധാന വേഷത്തിൽ എത്തുന്ന സിനിമ ഒരു ഇൻവെസ്റ്റിഗേഷൻ ത്രില്ലർ ആണ്. എസ് ജോർജാണ് ചിത്രത്തിന്റെ എക്സിക്യൂട്ടീവ് പ്രൊഡ്യൂസർ. മുഹമ്മദ് ഷാഫിയുടേതാണ് ചിത്രത്തിന്റെ കഥ. നടൻ റോണി ഡേവിഡ് രാജും മുഹമ്മദ് ഷാഫിയും ചേർന്നാണ് തിരക്കഥ രചിച്ചിരിക്കുന്നത്. മുഹമ്മദ് റാഹിൽ ആണ് ഛായാഗ്രഹണം. ചിത്രത്തിന്റെ സംഗീതം സുഷിൻ ശ്യാമും എഡിറ്റർ പ്രവീൺ പ്രഭാകറുമാണ്. ദുൽഖർ സൽമാന്റെ ഉടമസ്ഥതയിലുള്ള വേഫേയർ ഫിലിംസ് ആണ് ചിത്രം കേരളത്തിൽ വിതരണം നിർവഹിക്കുന്നത്. പാലാ, കൊച്ചി, കണ്ണൂർ, വയനാട്,അതിരപള്ളി, പൂനെ, മുംബൈ എന്നീ സ്ഥലങ്ങളായിരുന്നു പ്രധാന ലൊക്കേഷനുകൾ.
