പ്രണവ് മോഹന്‍ലാലിനെ നായകനാക്കി വിനീത് ശ്രീനിവാസന്‍ സംവിധാനം ചെയ്ത ഹൃദയം മറ്റ് ഭാഷകളിലേക്ക് റീമേക്ക് ചെയ്യുന്നു. തമിഴ്, ഹിന്ദി, തെലുങ്ക് ഭാഷകളിലേക്കാണ് ചിത്രം റീമേക്ക് ചെയ്യുന്നത്. ചിത്രത്തിന്റെ റീമേക്ക് അവകാശം സ്വന്തമാക്കിയെന്നും മറ്റ് ഭാഷകളിലേക്ക് ഉടന്‍ റീമേക്ക് ചെയ്യുമെന്നും ബോളിവുഡ് സംവിധായകന്‍ കരണ്‍ ജോഹര്‍ അറിയിച്ചു.
ഹൃദയത്തിന്റെ അണിയറപ്രവര്‍ത്തകരും ഇക്കാര്യം സ്ഥിരീകരിച്ചിട്ടുണ്ട്. വ്യവസായത്തിലെ അഭിമാനകരവും ആദരണീയരുമായ രണ്ട് പേരോട് സഹകരിക്കുക എന്നത് തങ്ങളുടെ സ്വപ്‌ന സാക്ഷാത്ക്കാരമാണെന്ന് ഹൃദയം നിര്‍മാതാക്കള്‍ പറഞ്ഞു. തങ്ങളുടെ സിനിമയിലുള്ള വിശ്വാസത്തിന് മാധവന്‍ സാറിനോടും കരണ്‍ ജോഹര്‍ സാറിനോടും നന്ദി പറയുന്നകതായും നിര്‍മാതാക്കള്‍ അറിയിച്ചു.
ജനുവരി 21നാണ് ഹൃദയം തീയറ്ററുകളിലെത്തിയത്. ആറു കോടി ബഡ്ജറ്റിലൊരുക്കിയ ചിത്രം കുറഞ്ഞ നാള്‍ കൊണ്ടുതന്നെ 55 കോടി കളക്ഷന്‍ നേടിയിരുന്നു. നാല്‍പത് വര്‍ഷങ്ങള്‍ക്ക് ശേഷം തെന്നിന്ത്യയിലെ പ്രമുഖ ചലച്ചിത്ര നിര്‍മ്മാണ കമ്പനിയായ മെരിലാന്‍ഡ് സിനിമാസ് തിരിച്ചെത്തി എന്നതും ഈ ചിത്രത്തിന്റെ പ്രത്യേകതയായിരുന്നു. മെരിലാന്‍ഡിന് വേണ്ടി വൈശാഖ് സുബ്രഹ്‌മണ്യനാണ് ഹൃദയം നിര്‍മിച്ചത്.
