സോഷ്യല്‍മീഡിയയില്‍ ചര്‍ച്ചയായി കരിക്കിന്റെ പുതിയ സീരീസായ കലക്കാച്ചി. നാല് മാസത്തിന് ശേഷമാണ് കരിക്ക് പുതിയ സീരീസുമായി ഡിസംബറില്‍ എത്തിയത്. ക്രിസ്മസ് ദിനത്തിലാണ് സീരീസ് ആദ്യ എപ്പിസോഡ് എത്തിയത്. രണ്ട് ഹോട്ടലുകള്‍ക്കിടയിലുള്ള കിടമത്സരവും മോഷണക്കേസിലെ പ്രതിയുമായി ഒരു പൊലീസ് കോണ്‍സ്റ്റബിള്‍ നടത്തുന്ന യാത്രയുമാണ് കഥാതന്തു.
സീരീസ് സംവിധാനം ചെയ്തിരിക്കുന്നത് കരിക്ക് ടീമിലെ തന്നെ അര്‍ജുന്‍ രത്തനാണ്. അവതരണത്തെയും അഭിനേതാക്കളെയും പ്രശംസിച്ച് നിരവധി പേരാണ് സിനിമാ ഗ്രൂപ്പുകളും സോഷ്യല്‍ മീഡിയയിലും എത്തുന്നത്. ഭീമന്റെ വഴി, കനകം കാമിനി കലഹം എന്നീ സിനിമകളിലൂടെ ശ്രദ്ധേയയായ വിന്‍സി അലോഷ്യസും കലക്കാച്ചി സീരീസില്‍ പ്രധാന റോളിലെത്തിയിരുന്നു.
തേരാ പാരയില്‍ ജോര്‍ജായെത്തിയ അനു.കെ. അനിയന് ഇത്തവണയും മേക്ക് ഓവറിലൂടെ ഞെട്ടിച്ചു. ജയില്‍പുള്ളിയുമായി ഹോട്ടലിലെത്തുന്ന വിജയന്‍ എന്ന പൊലീസുകാരനെയാണ് അനു കെ അനിയന് അവതരിപ്പിച്ചത്. ബാബു നമ്പൂതിരി എന്ന കഥാപാത്രത്തിന് ശേഷം അനു കെ അനിയന് ഏറ്റവുമധികം കയ്യടി നേടിക്കൊടുത്ത പ്രകടനവുമാണ് കലക്കാച്ചിയിലേത്. അര്‍ജന്റീന ഫാന്‍സ് കാട്ടൂര്‍ക്കടവ്, ട്രാന്‍സ് എന്നീ സിനിമകളിലും അനു അഭിനയിച്ചിട്ടുണ്ട്. ഉല്‍ക്ക എന്ന സീരീസില്‍ മാത്യൂസ് ആയും ഫാമിലി പാക്കില്‍ ബിബീഷായും അനു കെ അനിയന് നേരത്തെ മികച്ച പ്രകടനം കാഴ്ച വച്ചിരുന്നു.
