അഭിനേത്രിയായും മോഡലായും അവതാരകയായും പ്രേക്ഷകർക്ക് ഏറെ സുപരിചിതയായ താരമാണ് കസ്തൂരി. മലയാളം അടക്കം നാല് ദക്ഷിണേന്ത്യൻ ഭാഷകളിലാണ് കസ്തൂരി അഭിനയിച്ചിട്ടുള്ളത്. 1991ൽ അതാ ഉൻ കോയിലിലേ എന്ന തമിഴ് സിനിമയിലൂടെ അഭിനയ ജീവിതം ആരംഭിച്ച താരം 1992ൽ മിസ് മദ്രാസ് ആയി തിരഞ്ഞെടുക്കപ്പെട്ടിരുന്നു. തൊണ്ണൂറുകളിൽ നിറഞ്ഞു നിന്നിരുന്ന താരം ഇപ്പോൾ ചെറിയ റോളുകളിലാണ് അഭിനയിക്കുന്നത്. ടെലിവിഷൻ പരമ്പരകളിലും താരം അഭിനയിക്കുന്നുണ്ട്. പലപ്പോഴും തൻ്റെ രാഷ്ട്രീയ നിലപാടുകളിലൂടെ താരം വിവാദങ്ങളിലും പെട്ടിട്ടുണ്ട്. ചക്രവർത്തി, ദാദ, അനിയൻ ബാവ ചേട്ടൻ ബാവ, അഗ്രജൻ തുടങ്ങിയവയാണ് കസ്തൂരിയുടെ പ്രമുഖ മലയാള ചലച്ചിത്രങ്ങൾ.
ഡോക്ടർ രവികുമാറാണ് കസ്തൂരിയുടെ ഭർത്താവ്. ഒരു മകനും മകളും ഇവർക്കുണ്ട്. ലുക്കീമിയ രോഗത്തെ അതിജീവിച്ച വ്യക്തിയാണ് കസ്തൂരിയുടെ മകൾ. സ്റ്റേറ്റ് ലെവൽ ഹോക്കി ചാമ്പ്യനും ആർ ഡി കേഡറ്റുമായിരുന്ന കസ്തൂരി ബിബിസിയുടെ മാസ്റ്റർമൈൻഡ് 200 ക്വിസ് മത്സരത്തിലെ ഫൈനൽ മത്സരാർത്ഥിയായിരുന്നു. ബ്യൂട്ടി വിത്ത് എ ബ്രെയിൻ എന്നാണ് കസ്തൂരി അറിയപ്പെടുന്നത്. വിവാഹത്തിന് ശേഷം യു എസ് എയിൽ സ്ഥിരതാമസമാക്കിയ കസ്തൂരി ചെറിയ റോളുകളിലൂടെയും അവതാരകയായും എല്ലാം തിരിച്ചുവരികയും ചെയ്‌തു.
ടൈംസ് ഓഫ് ഇന്ത്യയിലും ട്വിറ്റർ വഴിയും സാമൂഹിക വിഷയങ്ങളിൽ സജീവമായ ഒരു കമന്റേറ്ററാണ് കസ്തൂരി. താരത്തിന്റെ ട്വീറ്റുകൾ പലപ്പോഴും മാധ്യമങ്ങളിൽ ചർച്ചയ്ക്ക് വഴി തെളിയിച്ചിട്ടുണ്ട്. 2017-ന്റെ തുടക്കത്തിൽ, ഒരു രാഷ്ട്രീയക്കാരൻ എന്ന നിലയിൽ രജനികാന്തിന്റെ കഴിവിനെ കസ്തൂരി ചോദ്യം ചെയ്യുകയും അത് തലൈവരുടെ ആരാധകരെ ചൊടിപ്പിക്കുകയും ചെയ്‌തിരുന്നു. അൻപത് വയസ്സിനോട് അടുക്കുമ്പോഴും ഒളി മങ്ങാത്ത സൗന്ദര്യമായി നില കൊള്ളുന്ന കസ്തൂരിയുടെ പുതിയ ഫോട്ടോഷൂട്ടാണ് ഇപ്പോൾ സോഷ്യൽ മീഡിയ കീഴടക്കുന്നത്.
View this post on Instagram
