സൂപ്പര്‍ സ്റ്റാര്‍ യാഷിന്റെ പടുകൂറ്റന്‍ പോട്രേറ്റ് ഒരുക്കി ആരാധകര്‍. കെജിഎഫ് ചാപ്റ്റര്‍ 2 വന്‍ തരംഗം സൃഷ്ടിച്ച് മുന്നേറുമ്പോഴാണ് പ്രിയപ്പെട്ട റോക്കി ഭായിക്കായി ആരാധകര്‍ വന്‍ പോട്രേറ്റ് ഒരുക്കിയത്. 135 അടി നീളം 190 അടി വീതി എന്നിങ്ങനെയാണ് പോട്രേറ്റിന്റെ കണക്ക്. ഈ പടുകൂറ്റന്‍ ചിത്രം വേള്‍ഡ് റെക്കോര്‍ഡും സ്വന്തമാക്കി കഴിഞ്ഞു.
ടീം യാഷ് എഫ്‌സിയാണ് വീഡിയോ പങ്കുവച്ചിരുന്നത്. അഖില കര്‍ണാടക റോക്കിംഗ് സ്റ്റാര്‍ യാഷ് ഫാന്‍സ് അസോസിയേഷന്‍ അംഗങ്ങളാണ് പടുകൂറ്റന്‍ പോട്രേറ്റ് നിര്‍മിച്ചത്. വലിയൊരു ഗ്രൗണ്ടില്‍ ഇരുപത്തി അയ്യായിരത്തി അറുന്നൂറ്റി അമ്പത് സ്‌ക്വര്‍ഫീറ്റിലാണ് ചിത്രം ഒരുക്കിയത്. സിനിമ മാത്രമല്ല, യാഷ് ആരാധകരും വേറെ ലെവലാണെന്ന് ജനങ്ങള്‍ക്ക് കാണിച്ചു കൊടുക്കുകയാണ് ഇതിലൂടെ ലക്ഷ്യമിടുന്നത്.
വര്‍ഷങ്ങളായി സിനിമയില്‍ ഉണ്ടായിരുന്നുവെങ്കിലും കെജിഎഫ് എന്ന ഒറ്റ ചിത്രത്തിലൂടെ ലോകമെമ്പാടും ആരാധകരെ സ്വന്തമാക്കിയ താരമാണ് യാഷ്. മിനി സ്‌ക്രീനിലൂടെ അഭിനയ രംഗത്തെത്തിയ യാഷ്, പ്രശാന്ത് നീല്‍ ചിത്രത്തിലൂടെ സിനിമാ ലോകത്ത് ഒഴിച്ചുകൂടാനാകാത്ത താരമായ് മാറിയിരിക്കുകയാണ്. കന്നഡ സിനിമാ മേഖലയുടെ തലവര മാറ്റി വരച്ച ചിത്രം കൂടിയായിരുന്നു കെജിഎഫ്. കേരളത്തിലടക്കം നിരവധി ആരാധകരെ സ്വന്തമാക്കാന്‍ കെജിഎഫിലൂടെ യാഷിന് സാധിച്ചു.
