കൊറോണയെ തുടർന്ന് അടച്ചിട്ട തിയറ്ററുകൾ തുറക്കുമ്പോൾ ചിരിയുടെ പൂരമൊരുക്കി നിരവധി സിനിമകളാണ് എത്തുന്നത്. ശ്രീനാഥ് ഭാസി, ബാലു വർഗീസ് എന്നിവരെ കേന്ദ്ര കഥാപാത്രങ്ങളാക്കി ഒരുങ്ങുന്ന ചിത്രം ‘സുമേഷ് & രമേഷ്’ നവംബർ 26ന് തീയറ്ററുകളിൽ എത്തും. നർമ്മത്തിന് പ്രാധാന്യം നൽകി സനൂപ് തൈക്കൂടം സംവിധാനം ചെയ്യുന്ന ചിത്രമാണ് ‘സുമേഷ് & രമേഷ്’.
വൈറ്റ്‌സാൻഡ്‌സ്‌ മീഡിയ ഹൗസിന്റെ ബാനറിൽ കെ എൽ 7 എന്റർടൈൻമെന്റ്സുമായി ചേർന്ന് ഫരീദ്‌ഖാൻ നിർമ്മിക്കുന്ന ചിത്രമാണ് ‘സുമേഷ് & രമേഷ്’. ചിത്രത്തിന്റെ ഛായാഗ്രഹണം ആൽബിയും എഡിറ്റിംഗ്‌ അയൂബ്‌ ഖാനും ആണ്. സംഗീത സംവിധാനം യാക്സൺ ഗാരി പെരേര, നേഹ എസ് നായർ എന്നിവർ ചേർന്നാണ്. സനൂപ് തൈക്കുടവും ജോസഫ്‌ വിജീഷും ചേർന്നാണ് തിരക്കഥയൊരുക്കിയിരിക്കുന്നത്‌.
2017-ൽ പുറത്തിറങ്ങിയ ചങ്ക്‌സ് എന്ന ചിത്രത്തിന്റെ സഹ തിരക്കഥാകൃത്ത് ആയിരുന്നു സനൂപ്. തന്റെ സുഹൃത്തുക്കളുടെ ജീവിതത്തിൽ നിന്നുള്ള യഥാർത്ഥ സംഭവങ്ങളിൽ നിന്നാണ് സുമേഷും രമേഷും സിനിമയുടെ പ്രചോദനമെന്ന് സംവിധായകനായ സനൂപ് നേരത്തെ പറഞ്ഞിട്ടുണ്ട്. തന്റെ സിനിമയുടെ പ്രധാന അടിത്തറ അതാണെന്നും കുടുംബത്തിന്റെ ആംഗിൾ പരമാവധി ലഭിക്കാനാണ് സഹോദരങ്ങളെ പ്രധാന കഥാപാത്രങ്ങളാക്കിയതെന്നും സനൂപ് നേരത്തെ പറഞ്ഞിരുന്നു.
ഇപ്പോഴിതാ ചിത്രത്തിലെ കിനാവിൽ എന്ന ഗാനം പുറത്തിറങ്ങിയിരിക്കുകയാണ്. യാക്സൺ ഗാരി പെരേര, നേഹ എസ് നായർ എന്നിവർ ചേർന്ന് ഈണമിട്ടിരിക്കുന്ന ഗാനം ആലപിച്ചിരിക്കുന്നത് നേഹ എസ് നായരും സംഗീതും ചേർന്നാണ്. വിനായക് ശശികുമാറിന്റേതാണ് വരികൾ.
