വ‍ർഷങ്ങളുടെ ഇടവേളയ്ക്ക് ശേഷം ശേഷം മലയാളത്തിന്റെ പ്രിയപ്പെട്ട നടി ഭാവന സിനിമയിലേക്ക് തിരിച്ചെത്തുന്ന ചിത്രമാണ് ന്റിക്കാക്കാക്കൊരു പ്രേമണ്ടാർന്ന്. ഷറഫുദ്ദീൻ നായകനായി എത്തുന്ന ചിത്രത്തിലെ പാട്ട് റിലീസ് ചെയ്തു. കൂടെ നിൻ കൂടെ എന്ന ഗാനത്തിന്റെ വീഡിയോ പതിപ്പ് ആണ് റിലീസ് ചെയ്തത്. വളരെ മനോഹരമായ ഒരു പ്രണയഗാനമാണ് കൂടെ നിൻ കൂടെ. വിനായക് ശശികുമാർ ആണ് പാട്ടിന്റെ വരികൾ രചിച്ചിരിക്കുന്നത്. ഹരിശങ്കർ, സിതാര കൃഷ്ണകുമാർ എന്നിവർ ചേർന്നാണ് പാട്ട് ആലപിച്ചിരിക്കുന്നത്.
ക്ലീൻ യു സർട്ടിഫിക്കറ്റ് ലഭിച്ച ചിത്രം ഫെബ്രുവരി 17ന് റിലീസ് ചെയ്യും.ഇതിനിടെ ചിത്രത്തിന്റെ ചില കഥാപാത്രങ്ങളെ വ്യക്തമാക്കുന്ന പോസ്റ്ററുകൾ പങ്കുവെച്ചിരിക്കുകയാണ് അണിയറപ്രവർത്തകർ. പുതുമുഖ സംവിധായകനായ ആദില്‍ മൈമൂനത്ത് അഷറഫാണ് ചിത്രത്തിന്റെ രചനയും, എഡിറ്റിംഗും, സംവിധാനവും നിര്‍വഹിക്കുന്നത്. ബോണ്‍ഹോമി എന്റര്‍ടെയ്ന്‍മെന്റ്‌സിന്റെ ബാനറില്‍ ലണ്ടന്‍ ടാക്കീസുമായി ചേര്‍ന്ന് റെനിഷ് അബ്ദുള്‍ഖാദര്‍, രാജേഷ് കൃഷ്ണ എന്നിവരാണ് ചിത്രം നിര്‍മിക്കുന്നത്. അരുണ്‍ റഷ്ദിയാണ് ചിത്രത്തിന്റെ ക്യാമറ കൈകാര്യം ചെയ്യുന്നത്.
വിനായക് ശശികുമാറിന്റെ വരികള്‍ക്ക് പോള്‍ മാത്യു, നിശാന്ത് രാംടെകെ, ജോക്കര്‍ ബ്ലൂസ് എന്നിവര്‍ സംഗീതം നല്‍കുന്നു. ഭാവനയ്ക്കും ഷറഫുദ്ദീനും പുറമേ അനാര്‍ക്കലി നാസര്‍, ഷെബിന്‍ ബെന്‍സണ്‍, അഫ്‌സാന ലക്ഷ്മി തുടങ്ങിയവരാണ് മറ്റ് പ്രധാന കഥാപാത്രങ്ങളെ അവതരിപ്പിക്കുന്നത്.
