ഇനി കുഞ്ചാക്കോ ബോബൻ നായകനല്ല. പ്രശസ്ത സംവിധായകൻ അമൽ നീരദ് ഒരുക്കുന്ന ചിത്രത്തിൽ ആന്റി ഹീറോ ആയി കുഞ്ചാക്കോ ബോബൻ എത്തുന്നു. ഒരു അമൽ നീരദ് ചിത്രത്തിൽ ഇത് ആദ്യമായാണ് കുഞ്ചാക്കോ ബോബൻ ഭാഗമാകുന്നത്. അമൽ നീരദ് പ്രൊഡക്ഷൻസിന്റെ ബാനറിൽ അമൽ നീരദ് തന്നെയാണ് ചിത്രം നിർമിക്കുന്നത്. മമ്മൂട്ടി നായകനായി എത്തിയ ഭീഷ്മ പർവത്തിനു ശേഷം അമൽ നീരദ് സംവിധാനം ചെയ്യുന്ന ചിത്രമാണ് ഇത്.
പുതിയ ചിത്രത്തിന്റെ ചിത്രീകരണം താമസിയാതെ തന്നെ ആരംഭിക്കും. ഭീഷ്മ പർവത്തിനു ശേഷം ബിഗ് ബിയുടെ രണ്ടാംഭാഗമായ ബിലാൽ ആയിരിക്കും അമൽ നീരദ് ഒരുക്കുക എന്ന് റിപ്പോർട്ടുകൾ ഉണ്ടായിരുന്നു. എന്നാൽ, ബിലാലിനു വേണ്ടിയുള്ള ആരാധകരുടെ കാത്തിരിപ്പ് നീളുകയാണ്. കുഞ്ചാക്കോ ബോബൻ ചിത്രത്തിന്റെ കൂടുതൽ വിശദാംശങ്ങൾ അണിയറപ്രവർത്തകർ ഉടൻ പുറത്തുവിടുന്നത് ആയിരിക്കും.
നിലവിൽ ഗ്ർർർ എന്ന ചിത്രത്തിൽ അഭിനയിച്ചു വരികയാണ് കുഞ്ചാക്കോ ബോബൻ. ഈ ചിത്രത്തിന്റെ ഷൂട്ടിംഗ് സൗത്ത് ആഫ്രിക്കയിലുമുണ്ട്. ജയസൂര്യയോട് ഒപ്പം അഭിനയിച്ച എന്താടാ സജി ആണ് കുഞ്ചാക്കോ ബോബന്റെ റിലീസിന് ഒരുങ്ങുന്ന ചിത്രം. ടിനു പാപ്പച്ചന്റെ ചാവേർ, സെന്ന ഹെഗ്ഡെയുടെ പദ്മിനി, ജൂഡ് അന്തോണി ജോസഫിന്റെ 2018 എന്നീ ചിത്രങ്ങളാണ് കുഞ്ചാക്കോ ബോബന്റെ റിലീസിന് ഒരുങ്ങുന്ന മറ്റ് ചിത്രങ്ങൾ.
