ഓണം റിലീസിന് കൂടുതല്‍ ചിത്രങ്ങള്‍. പ്രിയദര്‍ശന്റെ ബിഗ് ബജറ്റ് മോഹന്‍ലാല്‍ ചിത്രം ‘മരക്കാര്‍ അറബിക്കടലിന്റെ സിംഹ’ ഓണം റിലീസ് ആയി ഓഗസ്റ്റ് 12ന് തിയേറ്ററുകളില്‍ എത്തും. പിന്നാലെ ആസിഫ് അലി ചിത്രം ‘കുഞ്ഞെല്‍ദോ’യും ഓണത്തിന് റിലീസ് ചെയ്യും.
ആര്‍ ജെ മാത്തുക്കുട്ടിയാണ് ‘കുഞ്ഞെല്‍ദോ’ സംവിധാനം ചെയ്തിരിക്കുന്നത്. ഓണം സീസണ്‍ റിലീസ് ആയി ഓഗസ്റ്റ് 27ന് ചിത്രം തിയറ്ററുകളില്‍ എത്തും.
ലിറ്റില്‍ ബിഗ് ഫിലിംസിന്റെ ബാനറില്‍ സുവിന്‍ കെ വര്‍ക്കിയും പ്രശോഭ് കൃഷ്ണയും ചേര്‍ന്നാണ് ചിത്രം നിര്‍മ്മിച്ചിരിക്കുന്നത്. കുഞ്ഞിരാമായണം, എബി, കല്‍ക്കി എന്നീ ചിത്രങ്ങള്‍ നിര്‍മ്മിച്ച ബാനറാണ് ഇത്. വിനീത് ശ്രീനിവാസനാണ് ‘കുഞ്ഞെല്‍ദോ’യുടെ ക്രിയേറ്റീവ് ഡയറക്ടര്‍. ഛായാഗ്രഹണം സ്വരൂപ് ഫിലിപ്പ്. എഡിറ്റിംഗ് രഞ്ജന്‍ എബ്രഹാം. സംഗീതം ഷാന്‍ റഹ്മാന്‍. ചീഫ് അസോസിയേറ്റ് ഡയറക്ടര്‍ രാജേഷ് അടൂര്‍. വിതരണം സെഞ്ചുറി ഫിലിംസ് റിലീസ്.
