ലിജോ ജോസ് പെല്ലിശ്ശേരി ഒരുക്കിയ ഈ.മ.യൗ പ്രേക്ഷകപ്രശംസ നേടി മുന്നേറുകയാണ്. കടലോരമേഖലയിലെ ഒരു മരണവും ശവമടക്കുമെല്ലാം റിയലിസ്റ്റിക് രീതിയിൽ അത്ഭുതപ്പെടുത്തുന്ന വിധമാണ് ഈ.മ.യൗ ചിത്രീകരിച്ചിരിക്കുന്നത്. ചെമ്പൻ വിനോദ്, വിനായകൻ, ദിലീഷ് പോത്തൻ എന്നിവരാണ് ചിത്രത്തിലെ പ്രധാന കഥാപാത്രങ്ങളെ അവതരിപ്പിക്കുന്നത്. ചിത്രം വിജയകരമായി മുന്നേറുന്നതിനിടയിലാണ് ഡോൺ പാലത്തറ ഒരുക്കിയ ശവം എന്ന ചിത്രവുമായി ഈ.മ.യൗവിന് സാദൃശ്യമുണ്ടെന്ന വാദവുമായി ഡോൺ മുന്നോട്ടു വന്നത്. അതിനുള്ള പ്രതികരണം നടത്തിയിരിക്കുകയാണ് സംവിധായകൻ ലിജോ ജോസ് പെല്ലിശ്ശേരി ഏഷ്യാനെറ്റ് ന്യൂസിലെ പോയിന്റ് ബ്ലാങ്കിലൂടെ.
“ഒരു ക്രിസ്ത്യൻ ഫ്യൂണറൽ നമ്മൾ സിനിമയാക്കുമ്പോൾ തീർച്ചയായും ഒരു ക്രിസ്ത്യൻ ഫ്യൂണറലിൽ വരുന്ന എലെമെന്റ്സ് ഉണ്ടാകുമല്ലോ? ഇതിപ്പോൾ എന്റെ വീട്ടിലെ ഫ്യൂണറൽ ചിത്രീകരിച്ചാലും ഇതേ എലമെൻറ്സ് ഒക്കെ ഉണ്ടാകും. ആളുകൾ വരുന്നു, ശവപ്പെട്ടി വെച്ചിരിക്കുന്നു, ഫോട്ടോഗ്രാഫർ വരുന്നു. ഇത്തരം കാര്യങ്ങൾ നിർബന്ധമായും അതിലുണ്ടാകും. എനിക്കോ മാത്യൂസേട്ടനോ ക്രിസ്ത്യൻ ഫ്യൂണറലിന്റെ ഒരു തിരക്കഥ ഒരുക്കണമെങ്കിൽ ഡോൺ പാലത്തറയുടെ ഒരു സിനിമ കണ്ടു പഠിക്കേണ്ട യാതൊരു ആവശ്യവുമില്ല. പ്രത്യേകിച്ചും മാത്യൂസേട്ടന്. ഇതിപ്പോൾ ആവശ്യമില്ലാത്ത ഒരു പ്രശ്‌നമാണ്.”
