ലൂസിഫർ, അസുരൻ, പ്രതി പൂവൻകോഴി; ഹാട്രിക്ക് വിജയവുമായി ലേഡി സൂപ്പർസ്റ്റാർ മഞ്ജു വാര്യർ

റോഷൻ ആൻഡ്രൂസ് സംവിധാനം നിർവഹിച്ച പ്രതി പൂവൻകോഴി പ്രേക്ഷകർക്ക് നല്ലൊരു ചലച്ചിത്രാനുഭവമേകി മുന്നേറുമ്പോൾ ചിത്രം ലേഡി സൂപ്പർസ്റ്റാർ മഞ്ജു വാര്യർക്ക് സമ്മാനിച്ചിരിക്കുന്നത് ഒരു ഹാട്രിക്ക് വിജയമാണ്. 2019ൽ പ്രേക്ഷകർ മഞ്ജുവിനെ ആദ്യം കണ്ടത് മലയാളത്തിലെ ആദ്യ 200 കോടി ചിത്രമായ ലൂസിഫറിൽ മോഹൻലാലിനൊപ്പമാണ്. പ്രേക്ഷകർ ഏറെ ശ്രദ്ധിച്ച ചിത്രത്തിലെ പ്രിയ എന്ന കഥാപാത്രത്തിന് പിന്നാലെ തമിഴിലേക്ക് പച്ചൈയമ്മാളായി ധനുഷിന്റെ കൂടെ അസുരനിലൂടെ മഞ്ജു അരങ്ങേറ്റം കുറിച്ചു. 100 കോടി ക്ലബ്ബിൽ ചിത്രം ഇടം പിടിച്ചതോടെ മഞ്ജു വാര്യരെ തേടി നിരവധി അവസരങ്ങളാണ് ഇപ്പോൾ കോളിവുഡിൽ നിന്നും എത്തുന്നത്.

ഉണ്ണി ആറിന്റെ തിരക്കഥയിൽ റോഷൻ ആൻഡ്രൂസ് ഒരുക്കിയ പ്രതി പൂവൻകോഴിയും ഇപ്പോൾ വിജയ ചിത്രങ്ങളുടെ ലിസ്റ്റിൽ ഇടം പിടിച്ചു കഴിഞ്ഞു. സമൂഹത്തിലെ പലരും തുറന്ന് പറയാൻ മടിക്കുന്നതും പേടിക്കുന്നതുമായ ഒരു കാര്യത്തിന്റെ ശക്തമായ അവതരണമാണ് ചിത്രത്തെ വേറിട്ട് നിർത്തുന്നത്. റോഷൻ ആൻഡ്രൂസ്, അനുശ്രീ, സൈജു കുറുപ്പ്, അലൻസിയർ എന്നിവരും ചിത്രത്തിൽ അണിനിരക്കുന്നുണ്ട്. സന്തോഷ് ശിവൻ ഒരുക്കുന്ന ത്രില്ലർ ചിത്രം ജാക്ക് ആൻഡ് ജിൽ, പ്രിയദർശൻ – മോഹൻലാൽ കൂട്ടുക്കെട്ടിന്റെ ബ്രഹ്മാണ്ഡ ചിത്രം മരക്കാർ അറബിക്കടലിന്റെ സിംഹം എന്നിവയാണ് മഞ്ജുവിന്റെ പുറത്തിറങ്ങാൻ ഒരുങ്ങുന്ന ചിത്രങ്ങൾ.