മലയാളികളെ ഡിക്ഷണറി എടുപ്പിച്ച രാജയുടെ വാക്ക് – BROBDINGNAGIAN..!

ഇംഗ്ലീഷ് ഭാഷയിൽ രാജക്കുള്ള അഗാധ പാണ്ഡിത്യം മലയാളികളെ ചെറുതായിട്ടൊന്നുമല്ല പൊട്ടിച്ചിരിപ്പിച്ചിട്ടുള്ളത്. മലയാളവും ഇംഗ്ലീഷും തമ്മിൽ ഇത്ര അഭേദ്യമായ ഒരു കൂട്ടികിഴക്കൽ നടത്തിയ രാജയുടെ ഇംഗ്ലീഷ് കേട്ട് സായിപ്പന്മാർ പോലും തല കറങ്ങി വീണിട്ടുണ്ട് എന്നതാണ് ചരിത്രം. മലയാള സിനിമയുടെ ശശി തരൂർ ശ്രീ മധുരരാജ മലയാളികളെ ഡിക്ഷണറി എടുപ്പിക്കുന്ന ഒരു വാക്ക് പരിചയപ്പെടുത്തിയിരിക്കുകയാണ്. BROBDINGNAGIAN എന്ന മലയാളികൾ കേട്ടിട്ടില്ലാത്ത ഒരു വാക്കാണ് മധുരരാജ മലയാളികൾക്ക് പരിചയപ്പെടുത്തിയിരിക്കുന്നത്. ലോകസാഹിത്യത്തിലെ പ്രമുഖ നോവലുകളിൽ ഒന്നായ ജോനാഥൻ സ്വിഫ്റ്റിന്റെ ഗള്ളിവേഴ്‌സ് ട്രാവൽസ് എന്ന നോവലിലെ ഒരു സ്ഥലമായ BROBDINGNAG എന്ന പേരിനോട് ചേർത്താണ് ഈ പുതിയ വാക്കിന്റെ ഉത്ഭവം. വമ്പൻ, രാക്ഷസീയം എന്നിങ്ങനെയുള്ള അർത്ഥങ്ങളാണ് ഈ വാക്കിനുള്ളത്. ഏകദേശം 60 അടിയോളം ഉയരമുള്ള രാക്ഷസന്മാരാണ് ആ നാട്ടിൽ താമസിച്ചിരുന്നത്. അതിനാൽ തന്നെ അത്തരം വലിയ കാര്യങ്ങളെ കുറിച്ച് പറയുമ്പോഴാണ് BROBDINGNAGIAN എന്ന വാക്ക് കൂടുതലും ഉപയോഗിക്കുന്നത്.