മാലിക്കിന് പിന്നാലെ ഫഹദ് ഫാസിലും മഹേഷ് നാരായണനും വീണ്ടും ഒന്നിക്കുന്നു; ഷൂട്ടിംഗ് നാളെ മുതൽ

ഫഹദ് ഫാസിലിനെ നായകനാക്കി മഹേഷ് നാരായണൻ സംവിധാനം നിർവഹിച്ചിരിക്കുന്ന ബിഗ് ബജറ്റ് ചിത്രം മാലികിന്റെ റിലീസ് കോവിഡ് വ്യാപനത്തെ തുടർന്ന് അനിശ്ചിതാവസ്ഥയിലാണ്. എന്നാൽ ഇരുവരും വീണ്ടും ഒന്നിക്കുന്നുവെന്ന വാർത്തകളാണ് സോഷ്യൽ മീഡിയ കീഴടക്കുന്നത്. സീ യൂ സൂൺ എന്ന് പേരിട്ടിരിക്കുന്ന ചിത്രം നാളെ കൊച്ചിയിൽ ഷൂട്ട് തുടങ്ങും.

ഫഹദ് തന്നെയാണ് ചിത്രത്തിന്റെ നിർമാണം. ചിത്രീകരണം പൂർത്തീകരിക്കുവാനുള്ള സിനിമകൾ പൂർത്തിയാക്കാതെ പുതിയ ചിത്രങ്ങൾ ഷൂട്ട് തുടങ്ങരുത് എന്ന് കഴിഞ്ഞ ദിവസം കേരള ഫിലിം പ്രൊഡ്യൂസേഴ്‌സ് അസോസിയേഷൻ നിബന്ധന വെച്ചിട്ടുണ്ട്. എന്നാൽ ഈ ചിത്രം ഒരു മുഴുനീള ഫീച്ചർ ചിത്രമല്ലെന്നാണ് അറിയുവാൻ കഴിയുന്നത്. ഐ ഫോൺ വെച്ച് ഷൂട്ട് ചെയ്യുന്ന ഈ ചിത്രം ഒരു പുതിയ ശ്രമമാണെന്നാണ് സംവിധായകൻ വെളിപ്പെടുത്തിയിരിക്കുന്നത്. ഫഹദിന്റെ ഫ്ലാറ്റിൽ വെച്ച് ഷൂട്ട് ചെയ്യുന്ന ചിത്രം പുതിയ ഫോർമാറ്റിൽ എങ്ങനെ സിനിമ ഒരുക്കാം എന്നുള്ളതിനുള്ള ശ്രമമാണ്.