ട്രെൻഡിങ്ങിൽ നമ്പർ വൺ, കാഴ്ചക്കാർ ഒരു കോടിയിലേക്ക്, മലയാളസിനിമയിൽ ചരിത്രം സൃഷ്ടിച്ച് ‘മലൈക്കോട്ടൈ വാലിബൻ’ ടീസർ

മലയാളസിനിമയിൽ ഇത് ആദ്യമായാണ് ഒരു ടീസർ ഇത്ര വലിയ നേട്ടം സ്വന്തമാക്കുന്നത്. ഇതുവരെയുള്ള ചരിത്രത്തെയെല്ലാം കാറ്റിൽ പറത്തി മലൈക്കോട്ടൈ വാലിബൻ ടീസർ യുട്യൂബിൽ നമ്പർ വൺ ആയി കുതിക്കുകയാണ്. റിലീസ് ചെയ്ത് 24 മണിക്കൂറിനുള്ളിൽ 9.7 മില്യൺ വ്യൂസ് ആണ് ടീസറിന് ലഭിച്ചത്. ഒരു കോടിയിലേക്ക് ഉള്ള കുതിപ്പിലാണ് മോഹൻലാൽ ചിത്രത്തിന്റെ ടീസർ. ആരാധകർ അത്രയേറെ ആകാംക്ഷയോടെ കാത്തിരിക്കുന്ന ചിത്രമാണ് മലൈക്കോട്ടൈ വാലിബൻ. മോഹൻലാലിനെ നായകനാക്കി ലിജോ ജോസ് പെല്ലിശ്ശേരി സംവിധാനം ചെയ്യുന്നു എന്നത് തന്നെയാണ് മലൈക്കോട്ടൈ വാലിബന്റെ ഏറ്റവും വലിയ ആകർഷണം.

ദുൽഖർ നായകനായി എത്തിയ കിംഗ് ഓഫ് കൊത്ത, നിവിൻ പോളി നായകനായി എത്തിയ മഹാവീര്യർ എന്നീ ചിത്രങ്ങളുടെ ടീസർ ആണ് ഈ പട്ടികയിൽ രണ്ടും മൂന്നൂം സ്ഥാനങ്ങളിൽ. കിംഗ് ഓഫ് കൊത്ത ടീസർ റിലീസ് ചെയ്ത് 24 മണിക്കൂറിൽ 7.7 മില്യൺ വ്യൂസ് സ്വന്തമാക്കിയപ്പോൾ മഹാവീര്യർ 24 മണിക്കൂറിൽ സ്വന്തമാക്കിയത് ആറ് മില്യൺ വ്യൂസ് ആയിരുന്നു. റിലീസ് ചെയ്ത ആദ്യ 24 മണിക്കൂറിൽ മില്യൺ കാഴ്ചക്കാരെ സ്വന്തമാക്കിയ മറ്റ് ടീസറുകൾ ഇവയാണ്. ഗോൾഡ് (5.8 മില്യൺ), ഒരു അഡാർ ലവ് (4.6 മില്യൺ), ആറാട്ട് (3.3 മില്യൺ), സിബിഐ 5 ദ ബ്രയിൻ (3 മില്യൺ), ഭീഷ്മപർവം (2.9 മില്യൺ), കുറുപ്പ് (2.70 മില്യൺ), ഹൃദയം (1.92മില്യൺ).

മോഹൻലാലിനു പുറമേ സോണാലി കുല്‍ക്കര്‍ണിയും ചിത്രത്തില്‍ പ്രധാന വേഷത്തില്‍ എത്തുമ്പോള്‍ മറ്റ് കഥാപാത്രങ്ങളായി ഹരീഷ് പേരടി, കഥ നന്ദി, ഡാനിഷ് സെയ്‍ത്, മണികണ്ഠൻ ആര്‍ ആചാരി, ഹരിപ്രശാന്ത് വര്‍മ, രാജീവ് പിള്ള, സുചിത്ര നായര്‍ എന്നിവരും മലൈക്കോട്ടൈ വാലിബനിലുണ്ടാകും. ജനുവരി 25ന് ചിത്രം തിയറ്ററുകളിൽ റിലീസ് ചെയ്യും. രാജസ്ഥാനിലെ ജയ് സാൽമീറിൽ ആയിരുന്നു മലൈക്കോട്ടെ വാലിബന്റെ ഷൂട്ടിംഗ്. മധു നീലകണ്ഠന്‍ ആണ് ചിത്രത്തിന്റെ ഛായാഗ്രഹണം നിര്‍വഹിക്കുന്നത്. പ്രശാന്ത് പിള്ള സംഗീത സംവിധാനം നിര്‍വഹിക്കുന്ന ചിത്രത്തിന്റെ എഡിറ്റിങ് ദീപു ജോസഫ് ആണ്. ബിഗ് ബഡ്ജറ്റിൽ ഒരുങ്ങുന്ന മോഹന്‍ലാല്‍ ചിത്രത്തില്‍ ഇന്ത്യന്‍ സിനിമയിലെ പല പ്രഗത്ഭതാരങ്ങളും അഭിനയിക്കുന്നുണ്ട്. ജോൺ മേരി ക്രിയേറ്റീവിന്റെ ബാനറിൽ ഷിബു ബേബി ജോൺ, സെഞ്ച്വറി ഫിലിംസിന്റെ ബാനറിൽ കൊച്ചുമോൻ, മാക്സ് ലാബിന്റെ അനൂപ് എന്നിവർ ചേർന്നാണ് ചിത്രത്തിന്റെ നിർമാണം നിർവഹിക്കുന്നത്. ചിത്രത്തിന്റെ രചന നിർവഹിച്ചിരിക്കുന്നത് പി എസ് റഫീഖ് ആണ്. മോഹന്‍ലാലിനൊപ്പം മറാഠി നടി സൊണാലി കുല്‍ക്കര്‍ണി, ഹരീഷ് പേരടി, ഹരിപ്രശാന്ത് വര്‍മ്മ, മണികണ്ഠ രാജന്‍, സുചിത്ര നായര്‍, മനോജ് മോസസ്, ബംഗാളി നടി കഥ നന്ദി എന്നിവരും ചിത്രത്തില്‍ വേഷമിടുന്നുണ്ട്.