‘റോഷാക്ക് ഒരു തവണ കണ്ട് തൃപ്തിയാകാത്തവർ ഒന്നുകൂടി കാണണം’; ‘റോഷാക്ക്’ വിജയാഘോഷത്തിനിടയിൽ മമ്മൂട്ടി

റിലീസ് ചെയ്ത ആദ്യദിവസം മുതൽ മികച്ച പ്രതികരണവുമായി തിയറ്ററുകളിൽ പ്രദർശനം തുടരുകയാണ് മമ്മൂട്ടി നായകനായി എത്തിയ ചിത്രം റോഷാക്ക്. റോഷാക്കിന്റെ വിജയാഘോഷത്തിലാണ് അണിയറപ്രവർത്തകർ ഇപ്പോൾ. വിജയാഘോഷത്തിനായി റോഷാക്ക് ടീം ദുബായിൽ എത്തി. റോഷാക്ക് ഒരു തവണ കണ്ട് തൃപ്തിയാകാത്തവർ ഒന്നുകൂടി കാണണമെന്ന് മമ്മൂട്ടി പറഞ്ഞു. ദുബായിൽ മാധ്യമപ്രവർത്തകരോട് സംസാരിക്കവെയാണ് മമ്മൂട്ടി ഇങ്ങനെ പറഞ്ഞത്.

പാട്ടുകൾ കേട്ട് കേട്ട് ഇഷ്ടപ്പെടുന്നതു പോലെ സിനിമയും ഒന്നിൽ കൂടുതൽ തവണ കാണുമ്പോൾ കൂടുതൽ മിരച്ചതായി തോന്നും. പ്രേക്ഷകരുടെ ശ്രദ്ധ തെറ്റിപ്പോയാൽ സിനിമ മനസിലാക്കാൻ പ്രയാസമാകും. അതുകൊണ്ട് റോഷാക്ക് ഒരു തവണ കണ്ട് തൃപ്തിയാകാത്തവർ ഒന്നുകൂടി കാണണമെന്ന് മമ്മൂട്ടി പറഞ്ഞു. സിനിമ എങ്ങോട്ട് പോയാലും പ്രേക്ഷകൻ ഇല്ലെങ്കിൽ ആ സിനിമ എങ്ങുമെത്തില്ലെന്ന് മമ്മൂട്ടി പറഞ്ഞു. ഈ സിനിമയ്ക്കും ഇനിയുള്ള മലയാള സിനിമയ്ക്കും ഉണ്ടാകുന്ന മാറ്റം പ്രേക്ഷകനുണ്ടാകുന്ന മാറ്റമാണ്.

സിനിമയുടെയും ആസ്വാദനത്തിന്റെയും ശീലങ്ങൾ മാറിയെന്നും പുതിയ ബോധങ്ങളും ഉത്ബോധനങ്ങളും ഉണ്ടായെന്നും അദ്ദേഹം പറഞ്ഞു. കോവിഡ് കാലത്തിന് ശേഷമുള്ള മലയാള സിനിമ വേറെ തലത്തിലായി മാറി. അതിൽ താനും പങ്കാളിയായെന്നും സിനിമയ്ക്ക് ഒരു ക്ലാസേ ഉള്ളൂവെന്നും അത് സിനിമയുടെ ക്ലാസാണെന്നും അദ്ദേഹം പറഞ്ഞു. ചിത്രത്തിന്റെ വിജയത്തിൽ സന്തോഷവും അഭിമാനവും ഉണ്ടെന്ന് ഗ്രേസ് ആന്റണി പറഞ്ഞു. മമ്മൂട്ടിയുടെ കൂടെ അഭിനയിച്ചത് ആദ്യമായാണെന്നും അത് വിജയിച്ചതിലും മികച്ച ചിത്രമായി തീർന്നതിലും സന്തോഷമുണ്ടെന്നും ഷറഫുദ്ദീൻ പറഞ്ഞു. ട്രൂത്ത് ഗ്ലോബൽ ഫിലിംസ് ചെയർമാൻ അബ്ദുൽ സമദ്, ജോർജ് എന്നിവരും വാർത്താസമ്മേളനത്തിൽ സംബന്ധിച്ചു.