മമ്മൂട്ടിയും അൻവർ റഷീദും വീണ്ടും ഒരുമിക്കുന്നു; ഒപ്പം അമൽ നീരദും എത്തുമെന്ന് സൂചന

മമ്മൂട്ടിയെ നായകനാക്കിയ ‘രാജമാണിക്യം’ എന്ന ചിത്രത്തിലൂടെയാണ് അൻവർ റഷീദ് സംവിധായകനായി അരങ്ങേറ്റം കുറിച്ചത്. ആദ്യചിത്രം തന്നെ പ്രേക്ഷകർ ഏറ്റെടുത്തു. കാലങ്ങൾ കഴിഞ്ഞിട്ടും ചിത്രത്തിലെ ഡയലോഗുകൾ ഇപ്പോഴും നെഞ്ചിലേറ്റുന്നവരുണ്ട്. മമ്മൂട്ടിയുടെ കരിയറിലെ തന്നെ ഏറ്റവും വലിയ വിജയമായിരുന്നു ഈ ചിത്രം. മമ്മൂട്ടിയെ നായകനാക്കി അണ്ണൻ തമ്പി എന്നൊരു ചിത്രം കൂടി സംവിധാനം ചെയ്തു അൻവർ റഷീദ്. ഇപ്പോൾ ഇതാ മമ്മൂട്ടിയെ നായകനാക്കി അടുത്ത ചിത്രം സംവിധാനം ചെയ്യാനുള്ള ഒരുക്കത്തിലാണ് അൻവർ റഷീദ് എന്നാണ് റിപ്പോർട്ടുകൾ.

മമ്മൂട്ടിയെ നായകനാക്കിയുള്ള അൻവർ റഷീദിന്റെ പുതിയ ചിത്രം ഈ വർഷം തന്നെ ഉണ്ടാകുമെന്നാണ് റിപ്പോർട്ടുകൾ. അതേസമയം, ഈ ചിത്രത്തിന് കാമറ ചലിപ്പിക്കുന്നത് അമൽ നീരദ് ആയിരിക്കുമെന്നാണ് സൂചന. എന്നാൽ ഇത് സംബന്ധിച്ച് ഔദ്യോഗികമായ ഒരു വിശദീകരണവും വന്നിട്ടില്ല. എന്നാൽ, സോഷ്യൽ മീഡിയയിൽ ഇത്തരം ഒരു വാർത്ത പ്രചരിക്കുന്നുണ്ട്. നേരത്തെ, പ്രണവ് മോഹൻലാൽ നായകനായി എത്തുന്ന ചിത്രമായിരിക്കും അൻവർ റഷീദ് ചെയ്യുകയെന്ന് റിപ്പോർട്ടുകൾ ഉണ്ടായിരുന്നു. ഈ ചിത്രത്തിന് അഞ്ജലി മേനോൻ ആണ് തിരക്കഥ ഒരുക്കുന്നതെന്നും വാർത്തകൾ ഉണ്ടായിരുന്നു. എന്നാൽ, ഈ വാർത്തയ്ക്കും ഔദ്യോഗികമായി യാതൊരുവിധ സ്ഥിരീകരണവും ഇല്ല.

മോഹൻലാൽ നായകനായ ഛോട്ടാ മുംബൈ, ദുൽഖർ സൽമാൻ നായകനായ ഉസ്താദ് ഹോട്ടൽ, ഫഹദ് ഫാസിൽ നായകനായ ട്രാൻസ് എന്നിവയാണ് അൻവർ റഷീദ് ഒരുക്കിയ മറ്റ് ചിത്രങ്ങൾ. ഇതു കൂടാതെ, കേരളാ കഫേ എന്ന ആന്തോളജിയിലെ ബ്രിഡ്ജ്, അഞ്ചു സുന്ദരികൾ എന്ന ആന്തോളജിയിലെ ആമി എന്ന ചിത്രവും അദ്ദേഹം സംവിധാനം ചെയ്തു. ബാംഗ്ലൂർ ഡേയ്സ്, പ്രേമം, പറവ, ട്രാൻസ് എന്നീ ചിത്രങ്ങളുടെ നിർമ്മാതാവ് ആയിരുന്നു.