മലയാളത്തിന്റെ മഹാനടന്‍ മമ്മൂട്ടിയുടെ അഭിനയജീവിതത്തിന്റെ അന്‍പതാം വാര്‍ഷികത്തില്‍ ബിജെപിയുടെ ആദരം. അദ്ദേഹത്തിന്റെ വീട്ടില്‍ ചെന്ന് പാന്നാട അണിയിച്ചാണ് സംസ്ഥാന ബിജെപി ഘടകം അദ്ദേഹത്തെ ആദരിച്ചത്. ബിജെപി എറണാകുളം ജില്ലാ പ്രസിഡന്റിനും നേതാക്കള്‍ക്കുമൊപ്പമെത്തിയ കെ. സുരേന്ദ്രനാണ് മമ്മൂട്ടിയെ വീട്ടിലെത്തി പാന്നാട അണിയിച്ചത്. ഒപ്പം ഓണക്കോടി സമ്മാനമായി നല്‍കുകയും ചെയ്തു. ‘അഭിനയജീവിതത്തില്‍ അന്‍പതുവര്‍ഷം പൂര്‍ത്തിയാക്കുന്ന മലയാളത്തിന്റെ മഹാനടന്‍ മമ്മൂട്ടിയെ അദ്ദേഹത്തിന്റെ വീട്ടില്‍ ചെന്ന് ആദരിച്ചു’. ചിത്രത്തോടൊപ്പം സുരേന്ദ്രന്‍ ഫെയ്‌സ്ബുക്കില്‍ കുറിച്ചു.
കോവിഡ് സമയത്ത് പണം ചെലവാക്കി ഒരു ആഘോഷം തനിക്കുവേണ്ട എന്ന മാതൃകാ നിലപാടാണ് മമ്മൂട്ടി സ്വീകരിച്ചത്.
മമ്മൂട്ടിയുടെ സിനിമാജീവിതത്തിന്റെ സുവര്‍ണജൂബിലി ആഘോഷം വിപുലമായി നടത്താന്‍ സംസ്ഥാന സര്‍ക്കാര്‍ തീരുമാനിച്ചിരുന്നു. എന്നാല്‍ ഈ കോവിഡ് കാലത്ത് തന്റെ പേരില്‍ ആഘോഷം ഒന്നും തന്നെ നടത്തരുതെന്ന് സംസ്ഥാന സര്‍ക്കാരിനോട് അദ്ദേഹം അപേക്ഷിച്ചു. മമ്മൂട്ടിയുടെ ആദ്യ സിനിമ പുറത്തിറങ്ങിയിട്ട് അന്‍പതു വര്‍ഷം പൂര്‍ത്തിയായത് ഓഗസ്റ്റ് 6നാണ്.
