മമ്മൂട്ടി നായകനായി എത്തുന്ന ചിത്രം പുഴു ഒടിടിയിൽ റിലീസ് ചെയ്യും. ചിത്രത്തിന്റെ സംവിധായിക റതീനയാണ് ഇക്കാര്യം അറിയിച്ചത്. ഒരു ചാനൽ ചർച്ചയ്ക്കിടെ സംസാരിക്കുമ്പോൾ ആയിരുന്നു റതീന ഇക്കാര്യം പറഞ്ഞത്. ദുൽഖർ സൽമാന്റെ വേഫെറർ ഫിലിംസ് തന്നെയാണ് പുഴു ചിത്രവും നിർമിച്ചിരിക്കുന്നത്. പാർവതി തിരുവോത്ത് ആണ് ചിത്രത്തിൽ മമ്മൂട്ടിയുടെ നായികയായി എത്തുന്നത്.
ദുൽഖർ സൽമാൻ നായകനായി എത്തുന്ന ചിത്രം ‘സല്യൂട്ട്’ ഒടിടിയിൽ ആയിരിക്കും റിലീസ് എന്ന് കഴിഞ്ഞദിവസം പ്രഖ്യാപിച്ചിരുന്നു. സോണി ലിവിൽ മാർച്ച് 18ന് ചിത്രം റിലീസ് ചെയ്യും. ‘സല്യൂട്ട്’ ഒടിടിയിൽ റിലീസ് ചെയ്യുമെന്ന് പ്രഖ്യാപിച്ചതിനു പിന്നാലെ ദുൽഖർ സൽമാനും നടന്റെ ഉടമസ്ഥതയിലുള്ള വേഫെറർ ഫിലിംസിനും തിയറ്റർ ഉടമകളുടെ സംഘടന വിലക്ക് ഏർപ്പെടുത്തിയിരുന്നു. ഇതിന് പിന്നാലെയാണ് മമ്മൂട്ടി ചിത്രം പുഴും സോണി ലിവിൽ ആയിരിക്കും റിലീസ് ചെയ്യുകയെന്ന വിവരം പുറത്തുവരുന്നത്.
പുഴുവിന്റെ നിർമാണം ദുൽഖറിന്റെ വേഫെറർ ഫിലിംസ് ആണ്. ഈ സാഹചര്യത്തിൽ ദുൽഖറിനും നിർമാണ കമ്പനിക്കും ഏർപ്പെടുത്തിയിരിക്കുന്ന വിലക്ക് മമ്മൂട്ടിക്കും ഏർപ്പെടുത്തുമോ എന്നാണ് സിനിമാലോകം ഉറ്റുനോക്കുന്നത്. അതേസമയം, ആദ്യമായി ഒടിടി പ്ലാറ്റ്ഫോമിൽ റിലീസ് ചെയ്യുന്ന മമ്മൂട്ടി ചിത്രമെന്ന പ്രത്യേകതയും പുഴു സിനിമയ്ക്കുണ്ട്. അതേസമയം, സല്യൂട്ട് ഒടിടിക്ക് നൽകി ദുൽഖർ വഞ്ചിച്ചുവെന്നാണ് ഫിയോക്ക് പറയുന്നത്. സല്യൂട്ട് തിയറ്ററിൽ റിലീസ് ചെയ്യുമെന്ന് ദുൽഖർ വാക്ക് നൽകിയിരുന്നെന്നാണ് ഫിയോക്ക് പറയുന്നത്. റോഷൻ ആൻഡ്രൂസ് ആണ് ചിത്രത്തിന്റെ സംവിധാനം.
