ഒരു അറേഞ്ച്ഡ് മാര്യേജും അതിനുശേഷം വിവാഹിതരായ ദമ്പതികളുടെ ജീവിതത്തിൽ നടക്കുന്ന ചില അനിഷ്ടസംഭവങ്ങളും പിന്നീട് അവർ ഒന്നാകുന്നതും പറഞ്ഞ സിനിമ ആയിരുന്നു ‘കെട്ട്യോളാണ് എന്റെ മാലാഖ’. നിസാം ബഷീർ സംവിധാനം ചെയ്ത ഈ ചിത്രത്തിൽ ആസിഫ് അലി, വീണ നന്ദകുമാർ എന്നിവർ ആയിരുന്നു പ്രധാന കഥാപാത്രങ്ങളെ അവതരിപ്പിച്ചത്. ‘കെട്ട്യോളാണ് എന്റെ മാലാഖ’ എന്ന ചിത്രത്തിനു ശേഷം നിസാം ബഷീർ സംവിധാനം ചെയ്യുന്ന പുതിയ ചിത്രം ചാലക്കുടിയിൽ ആരംഭിച്ചു. മമ്മൂട്ടിയാണ് ചിത്രത്തിൽ നായകൻ. മമ്മൂട്ടിയുടെ തന്നെ നിർമാണ സംരംഭമായ മമ്മൂട്ടി കമ്പനിയാണ് ചിത്രം നിർമിക്കുന്നത്. ചിത്രത്തിന്റെ പൂജയും സ്വിച്ച് ഓൺ കർമവും ചാലക്കുടിയിൽ നടന്നു. ഏപ്രിൽ മൂന്ന് മുതൽ മമ്മൂട്ടി ചിത്രത്തിൽ ജോയിൻ ചെയ്യും. മമ്മൂട്ടിയും നിസാം ബഷീറും ആദ്യമായി ഒരുമിക്കുന്ന ചിത്രം ഒരു ത്രില്ലർ ചിത്രമാണെന്ന പ്രത്യേകതയും ഉണ്ട്. അഡ്വഞ്ചേഴ്സ് ഓഫ് ഓമനക്കുട്ടൻ, ഇബിലീസ് തുടങ്ങിയ ചിത്രങ്ങളുടെ തിരക്കഥാകൃത്തായ സമീർ അബ്ദുൾ ആണ് ഈ ചിത്രത്തിന്റെയും തിരക്കഥാകൃത്ത്.
ഷറഫുദ്ദീൻ, കോട്ടയം നസീർ, ജഗദീഷ്, സഞ്ജു ശിവറാം, ഗ്രേസ് ആന്റണി, ബിന്ദു പണിക്കർ, ബാബു അന്നൂർ, അനീഷ് ഷൊർണൂർ, റിയാസ് നർമ്മകല, ജോർഡി പൂഞ്ഞാർ എന്നിവരാണ് ചിത്രത്തിലെ മറ്റ് പ്രധാന കഥാപാത്രങ്ങളെ അവതരിപ്പിക്കുന്നത്. നിമീഷ് രവിയാണ് ചിത്രത്തിന്റെ ഛായാഗ്രഹണം. ‘ഗരുഡ ഗമന വൃഷഭ വാഹന’ എന്ന കന്നഡത്തിലെ സൂപ്പർഹിറ്റ് ചിത്രത്തിലൂടെ ശ്രദ്ധേയനായ മിഥുൻ മുകുന്ദൻ ആണ് സംഗീതം നിർവഹിക്കുന്നത്. എൻ എം ബാദുഷയാണ് ചിത്രത്തിന്റെ സഹനിർമാതാവ്. എഡിറ്റിംഗ് – കിരൺ ദാസ്, കലാസംവിധാനം – ഷാജി നടുവിൽ, പ്രൊഡക്ഷൻ കൺട്രോളർ – പ്രശാന്ത് നാരായണൻ, പ്രൊഡക്ഷൻ എക്സിക്യൂട്ടീവ് – ഔസേപ്പച്ചൻ, മേക്കപ്പ് – റോണക്സ് സേവ്യർ & എസ്.ജോർജ്, കോസ്റ്റ്യൂം – സമീറ സനീഷ്, പി ആർ ഒ – പി ശിവപ്രസാദ്, സ്റ്റിൽസ് – ശ്രീനാഥ് എൻ ഉണ്ണികൃഷ്ണൻ എന്നിവരാണ് മറ്റ് പ്രധാന അണിയറപ്രവർത്തകർ. കൊച്ചിയാണ് ചിത്രത്തിന്റെ മറ്റൊരു പ്രധാന ലൊക്കേഷൻ.
അതേസമയം ചിത്രത്തിന് ഇതുവരെയും പേരിട്ടിട്ടില്ല. മമ്മൂട്ടി കമ്പനിയുടെ രണ്ടാമത്തെ നിർമാണ സംരംഭം ആണ് ചിത്രം. ലിജോ ജോസ് പെല്ലിശ്ശേരി സംവിധാനം ചെയ്ത് മമ്മൂട്ടി നായകനാകുന്ന ‘നൻപകൽ നേരത്ത് മയക്കം’ ആണ് മമ്മൂട്ടി കമ്പനിയുടെ ആദ്യ ചിത്രം. റിലീസിനായി ഒരുങ്ങികൊണ്ടിരിക്കുന്ന ചിത്രത്തിന്റെ ഔദ്യോഗിക ടീസർ റിലീസ് ചെയ്തിരുന്നു. സോഷ്യൽ മീഡിയയിൽ റിലീസായി വളരെ ഗംഭീര അഭിപ്രായം ഇതിനകം ടീസർ നേടിക്കഴിഞ്ഞു. റത്തീന സംവിധാനം ചെയ്ത ചിത്രം ‘പുഴു’ ആണ് അടുത്തതായി പുറത്തിറങ്ങാനിരിക്കുന്ന മമ്മൂട്ടി ചിത്രം. സോണി ലിവ് ഒ ടി ടിയിലൂടെയാണ് ചിത്രം പുറത്തിറങ്ങുന്നത്.
