താരരാജാക്കന്മാരായ മമ്മൂട്ടിയുടേയും മോഹന്‍ലാലിന്റേയും ചിത്രങ്ങള്‍ ഒരേ ദിവസം തീയറ്ററുകളില്‍ എത്തുന്നു. മമ്മൂട്ടിയെ നായകനാക്കി ബി ഉണ്ണികൃഷ്ണന്‍ ഒരുക്കിയി ക്രിസ്റ്റഫറും ഭദ്രന്റെ സംവിധാനത്തില്‍ മോഹന്‍ലാലിനെ നായകനാക്കി ഒരുക്കിയ സ്ഫടികത്തിന്റെ റീമാസ്റ്റേര്‍ഡ് പതിപ്പുമാണ് ഒരേ ദിവസം തീയറ്ററുകളില്‍ എത്തുന്നത്. ഫെബ്രുവരി ഒമ്പതിനെത്തുന്ന ഇരു ചിത്രങ്ങള്‍ക്കുമായി കാത്തിരിക്കുകയാണ് പ്രേക്ഷകര്‍.
നേരത്തേ മമ്മൂട്ടി, മോഹന്‍ലാല്‍ ചിത്രങ്ങള്‍ ദിവസങ്ങളുടെ ഇടവേളകളില്‍ തീയറ്ററുകളില്‍ എത്തിയിട്ടുണ്ടെങ്കിലും ഇതാദ്യമായാണ് ഇരുവരുടേയും ചിത്രങ്ങള്‍ ഒറ്റദിവസം തീയറ്ററുകളില്‍ റിലീസ് ചെയ്യുന്നത്. 2006 ഒക്ടോബര്‍ 21ന് മമ്മൂട്ടി ചിത്രം പോത്തന്‍ വാവ റിലീസ് ചെയ്തപ്പോള്‍ മോഹന്‍ലാല്‍ നായകനായി എത്തിയ ഫോട്ടോഗ്രാഫര്‍ ഒക്ടോബര്‍ 24നാണ് തീയറ്ററുകളില്‍ എത്തിയത്. 2007 ജൂലൈ അഞ്ചിനാണ് മോഹന്‍ലാലിന്റെ ഹലോ റിലീസ് ചെയ്യുന്നത്. തുടര്‍ന്ന് ജൂലൈ 12ന് മമ്മൂട്ടിയുടെ മിഷന്‍ 90 ഡെയ്‌സ് എന്ന സിനിമയും റിലീസിനെത്തി. 2007 ഏപ്രില്‍ ആറിന് പുറത്തെത്തിയ ഛോട്ടാ മുംബൈയും ഏപ്രില്‍ 14നെത്തിയ ബിഗ് ബിയുമാണ് മറ്റ് രണ്ട് ചിത്രങ്ങള്‍. 2008 ഏപ്രില്‍ 11നാണ് സത്യന്‍ അന്തിക്കാടിന്റെ സംവിധാനത്തിലൊരുങ്ങിയ മോഹന്‍ലാല്‍ ചിത്രം ഇന്നത്തെ ചിന്താവിഷയം തീയറ്ററിലെത്തുന്നത്. ഒരാഴ്ച്ചത്തെ വ്യത്യാസത്തില്‍ 17ന് അണ്ണന്‍ തമ്പിയും റിലീസ് ചെയ്തു. 2009 ഒക്ടോബര്‍ 16നാണ് മമ്മൂട്ടി നായകനായ ചരിത്ര സിനിമ പഴശ്ശിരാജ റിലീസിനെത്തിയത്. 22ന് എയ്ഞ്ചല്‍ ജോണ്‍ റിലീസ് ചെയ്തു. ഇത്തരത്തില്‍ ഇരുവരുടേയും ചിത്രങ്ങള്‍ ദിവസങ്ങളുടേയും ആഴ്ചകളുടേയും വ്യത്യാസത്തില്‍ തീയറ്ററുകളില്‍ ആഘോഷം തീര്‍ത്തു. ക്രിസ്റ്റഫുറും സ്ഫടികവും ഒരേ ദിവസമെത്തുമ്പോള്‍ തീയറ്ററുകള്‍ പൂരപ്പറമ്പാകുമെന്നാണ് പ്രതീക്ഷിക്കുന്നത്.
നീണ്ട ഇടവേളയ്ക്ക് ശേഷമാണ് മമ്മൂട്ടിയും ബി ഉണ്ണികൃഷ്ണനും ഒന്നിക്കുന്നത്. ഒരു പൊലീസ് കഥയാണ് ക്രിസ്റ്റഫര്‍ പറയുന്നത്. തമിഴ് താരം വിനയ് റായിയാണ് ചിത്രത്തിലെ വില്ലന്‍ കഥാപാത്രത്തെ അവതരിപ്പിക്കുന്നത്. ഐശ്വര്യ ലക്ഷ്മി, അമല പോള്‍ എന്നിവരാണ് നായിക കഥാപാത്രങ്ങളെ അവതരിപ്പിക്കുന്നത്. പഴയതില്‍ നിന്ന് വ്യത്യസ്തമായി കൂടുതല്‍ തെളിവോടെയാകും സ്ഫടികം വീണ്ടും പ്രേക്ഷകരിലേക്കെത്തുന്നത്. ചെന്നൈയില്‍ പ്രിയദര്‍ശന്റെ ഉടമസ്ഥതയിലുള്ള ഫോര്‍ ഫ്രെയിംസ് സ്റ്റുഡിയോയില്‍ വച്ചാണ് ചിത്രത്തിന്റെ റീ മാസ്റ്ററിംഗ് പൂര്‍ത്തിയായത്. പ്രേക്ഷകര്‍ ആകാംക്ഷയോടെയാണ് ചിത്രത്തിന്റെ റീ മാസ്റ്റര്‍ പതിപ്പിനായി കാത്തിരിക്കുന്നത്.
