റേഷൻ അരി വാങ്ങാൻ ഒരു മടിയുമില്ല,ഇതൊക്കെ നാണക്കേട് ആണെങ്കിൽ ഈ നാണക്കേട് തന്നെയാണ് ഞാൻ ഇന്നുള്ള വ്യക്തിയായി തീരുവാൻ കാരണം;മനസ്സ് തുറന്ന് മണിയൻപിള്ള രാജു

ലോകം മുഴുവൻ കൊറോണ വൈറസ് വ്യാപിക്കുകയാണ്. ഏപ്രിൽ 14 വരെ ലോക്ക് ഡൗൺ പ്രഖ്യാപിച്ചിരിക്കുന്ന ഈ അവസരത്തിൽ ഷൂട്ടിങ് എല്ലാം നിർത്തി വച്ചിരിക്കുന്നതിനാൽ താരങ്ങളെല്ലാം വീട്ടിൽ തന്നെയാണ്. താൻ ആദ്യമായി സൗജന്യമായി ലഭിക്കുന്ന റേഷൻ വാങ്ങിച്ചു എന്ന വാർത്ത ലോകത്തെ അറിയിക്കുകയാണ് മണിയൻപിള്ളരാജു. റേഷൻ വാങ്ങിക്കുവാൻ ആയി മകനെയുംകൂട്ടി പോയപ്പോൾ എതിരെ വന്ന ഒരാൾ എങ്ങോട്ടാണെന്ന് ചോദിക്കുകയും റേഷൻ കട വരെ പോവുകയാണെന്ന് മണിയൻപിള്ളരാജു പറയുകയും ചെയ്തു. സാറിന് നാണമില്ലേ റേഷൻ വാങ്ങാൻ എന്നായിരുന്നു അദ്ദേഹത്തിന്റെ പ്രതികരണം. എനിക്കൊരു നാണക്കേടും ഇല്ല.

ഇതൊക്കെ നാണക്കേട് ആണെങ്കിൽ ഈ നാണക്കേട് തന്നെയാണ് ഞാൻ ഇന്നുള്ള വ്യക്തിയായി തീരുവാൻ കാരണം എന്നായിരുന്നു മണിയൻപിള്ള രാജുവിന്റെ മറുപടി. 10 കിലോ പുഴക്കലരിയും 5 കിലോ ചമ്പാവരിയും വാങ്ങി മടങ്ങിയ അദ്ദേഹം വീട്ടിൽ ചെന്ന് ചോറ് വെച്ചപ്പോൾ നല്ല രുചി അനുഭവപ്പെട്ടു. അദ്ദേഹത്തിന്റെ വാക്കുകളിൽ സാധാരണ വയ്ക്കുന്ന ചോറിനേക്കാൾ രുചി ആയിരുന്നു അതിന്. സൗജന്യമായി ലഭിക്കുന്ന റേഷൻ വളരെ മോശമാണെന്ന് നിരവധി കമന്റുകൾ കേട്ടതിന്റെ ഫലമായിട്ടാണ് മണിയൻപിള്ളരാജു റേഷൻ വാങ്ങാൻ തീരുമാനിച്ചത്. തനിക്ക് തന്റെ കുട്ടിക്കാലമാണ് ഓർമ്മ വരുന്നത് എന്നും 5 മക്കളുള്ള കുടുംബത്തിൽ റേഷൻ മാത്രമായിരുന്നു പ്രധാന ആഹാരം എന്നും മണിയൻപിള്ളരാജു ഓർത്തെടുത്ത് പറയുന്നു. ഇപ്പോൾ ഈ റേഷൻ അരിയെ പുച്ഛിക്കുന്നവർക്ക് വിശപ്പിന്റെ വില അറിയില്ലെന്നും അല്ലെങ്കിൽ അതൊക്കെ മറന്നത് ആകും എന്നും താരം പറയുന്നു.