മോഹൻലാലിന്റെ ദുബായിലെ വീട്ടിൽ എംജി ശ്രീകുമാറും ഭാര്യയും; ‘സൂപ്പർ സ്റ്റാർ വിത്ത് സൂപ്പർ സിംഗർ’ എന്ന് ആരാധകർ

ദുബായിലെ മോഹൻലാലിന്റെ വീട്ടിലെത്തി ഗായകൻ എം ജി ശ്രീകുമാറും ഭാര്യ ലേഖ എംജി ശ്രീകുമാറും. മോഹൻലാലും ഭാര്യ സുചിത്രയെയും ഇരുവരും കണ്ടു. ദുബായിലെ മോഹൻലാലിന്റെ വീട്ടിൽ നിന്നുള്ള ചിത്രം ലേഖ എം ജി ശ്രീകുമാർ ആണ് സോഷ്യൽ മീഡിയയിൽ പങ്കുവെച്ചത്. മോഹൻലാലും എം ജി ശ്രീകുമാറും അടുത്ത സുഹൃത്തുക്കളാണ്. ശ്രിക്കുട്ടനുമായുള്ള സൗഹൃദത്തെക്കുറിച്ച് മോഹൻലാലും നിരവധി തവണ പറഞ്ഞിട്ടുണ്ട്. ഗോൾഡൻ വിസ സ്വീകരിക്കാൻ ദുബായിൽ എത്തിയത് ആയിരുന്നു എം ജി ശ്രീകുമാറും ലേഖയും.

‘മോഹൻലാലിന്റെ ദുബായിലെ വീട്’ എന്ന അടിക്കുറിപ്പോടു കൂടിയാണ് മോഹൻലാലിന് ഒപ്പവും ഭാര്യം സുചിത്രയ്ക്ക് ഒപ്പവുമുള്ള ചിത്രങ്ങൾ ലേഖ എം ജി ശ്രീകുമാർ പങ്കുവെച്ചത്. ലേഖയെയും എം ജി ശ്രീകുമാറിനെയും മോഹൻലാൽ ചേർത്തു നിർത്തിയുള്ള ഒരു ഫോട്ടോയും മോഹൻലാലിനും ഭാര്യ സുചിത്രയ്ക്കും ഒപ്പം ലേഖയും ശ്രീകുമാറും ഒരുമിച്ചിരിക്കുന്ന ചിത്രവുമായിരുന്നു ലേഖ ഫേസ്ബുക്കിൽ പങ്കുവെച്ചത്. നിരവധി പേരാണ് ചിത്രത്തിന് താഴെ കമന്റുകളുമായി എത്തിയത്. ‘സൂപ്പർ സ്റ്റാർ വിത്ത സൂപ്പർ സിഗർ’ എന്നായിരുന്നു ഒരു കമന്റ്.

കഴിഞ്ഞയിടെ തന്റെ കുടുംബജീവിതത്തെക്കുറിച്ചും മകളെക്കുറിച്ചും ലേഖ ശ്രീകുമാർ തുറന്നു പറഞ്ഞത് വിവാദമായിരുന്നു. തനിക്ക് മറച്ചുപിടിക്കാൻ ഒന്നുമില്ലെന്ന് ആയിരുന്നു ഗൃഹലക്ഷ്മിക്ക് നൽകിയ അഭിമുഖത്തിൽ ലേഖ പറഞ്ഞത്. തനിക്കൊരു മോളുണ്ടെന്നത് എല്ലാവർക്കും അറിയാവുന്ന കാര്യമാണെന്നും മകൾ കല്യാണം കഴിഞ്ഞ് അമേരിക്കയിലാണെന്നും ലേഖ ശ്രീകുമാർ അതിൽ വ്യക്തമാക്കിയിരുന്നു. തങ്ങളും അവരും ഹാപ്പിയാണെന്നും ലേഖ ശ്രീകുമാർ പറഞ്ഞു. ശ്രീക്കുട്ടന്റെ പാട്ട് കേട്ട് എടുത്ത തീരുമാനം അല്ല തന്റേതെന്നും പരസ്പരം പൂർണമായി മനസിലാക്കിയ ശേഷമെടുത്ത തീരുമാനമായിരുന്നു വിവാഹമെന്നും ലേഖ പറഞ്ഞു. എം ജി ശ്രീകുമാറിനെ കണ്ടുമുട്ടിയതാണ് ജീവിതത്തിലെ ഏറ്റവും സുന്ദരനിമിഷം എന്ന് ലേഖ പറഞ്ഞിട്ടുണ്ട്. തന്റെ സൗന്ദര്യത്തിനു പിന്നിൽ ഭർത്താവിന്റെ സ്നേഹമാണെന്നും താൻ ഒന്നും പറയാതെ തന്നെ തനിക്കായി വേണ്ടതൊക്കെ ചെയ്യുന്ന ആളാണ് ശ്രീക്കുട്ടനെന്നും ലേഖ നേരത്തെയും തുറന്നു പറഞ്ഞിട്ടുണ്ട്.